E tema di cannabis medicinal ta uno cu ainda ta discuti riba dje. Na inicio di siman pasa, lider di fraccion di RED, Ricardo Croes a laga sa cu ta incorecto di pretende cu nan partido ta impopular, pasobra nan no a cumpli cu legalisacion di cannabis ya sea cu fin medicinal, recreacional, spiritual, social, etc…

“Esaki ta e percepcion cu a wordo crea pa pinta nos manera un cos cu nos no a cumpli,” el a bisa. Parlamentario Croes a expresa cu no ta den su man, y tampoco di minister Rudy Lampe pa legalisacion di cannabis.

E ta haya cu e ta den man di mas cu un minister, esta prome minister cu tin e comision di cannabis, minister di Economia kende ya a mir’e como un pilar economico, minister di Sector Primario pa stimula innovacion den agricultura y minister di Salubridad kende ta esun finalmente encarga cu legalisacion specifico.

Permiso

Di su banda, minister di Salubridad Publico, Dangui Oduber a declara na Bon Dia Aruba cu cannabis medicinal tabata un acuerdo di gobernacion di e partidonan di coalicion MEP-POR-RED. El a laga sa cu desde cu nan a drenta gobernacion, nan a cuminsa cu e proceso pa cumpli cune. E ta inclui e proceso pa legalisa cannabis medicinal.

Na luna di december gobierno a duna algun permiso di importacion caba. Mientras cu gobierno no a duna permiso pa cultiva, importa, procesa y exporta cannabis cu meta medicinal ainda.

Te aworaki cuater permiso a wordo otorga pa tur esnan cu a expresa interes pa importacion di productonan di cannabis medicinal. Sinembargo, gobierno ta habri pa considera mas peticion si tin interes pa importa cannabis medicinal.

“Si nan ta cumpli cu exigencianan, gobierno ta habri pa explora e posibilidad, tanten cu nan ta cumpli cu e exigencianan cu ministerio ta pone y tambe di Inspectie Volksgezondheid…” el a bisa.

Nan mester cumpli cu un lista di criterianan. Un di e criterianan ta cu tur e productonan importa mester wordo inspecciona pa Inspectie Volksgezondheid. Tur producto mester wordo acredita y getest na laboratorionan cu ta certifica pa test e productonan aki. Tambe mester cumpli cu tur rekisito standard pa e permiso di importacion di e tipo di producto aki y tur screening cu gobierno a pone, etc.

Otro sorto di permiso

Mientras cu gobierno no a duna permiso pa cultiva, importa, procesa y exporta cannabis cu meta medicinal ainda. E mandatario a bisa cu esaki tin un proceso mas largo, segun reglamento internacional cu ta data di 1961 y cu ta regula e tipo di actividad pa duna permiso pa cultiva, importa, procesa y exporta ainda.

El a agrega cu tin un gran cantidad di grupo cu a expresa nan interes. Pero debidamente nan lo informa riba e siguiente trayecto prome cu otorga e tipo di permiso aki. Minister Oduber ta wak cu e proceso aki ta canando manera nan a premira, y nan ta yegando hopi cerca pa gobierno cuminsa otorga e prome permisonan.

Gobierno tin pensa di otorga 10 licencia total. Nan ta bay cuminsa na cinco licencia mara na condicionnan estricto. Un di e rekisito aki lo ta por ehempel cu e permiso no ta uno transferibel. Ademas e compania of grupo cu ta haya e permiso ta mara na tempo pa ehecuta e proyecto. Si den e periodo ey nada ta sucede, y niun inversion a tuma luga, e permiso ta wordo hala aden y ta duna na otro grupo e oportunidad aki.

Tur rekisito y condicion lo wordo publica caminda esunnan cu a mustra nan interes mester cumpli cune. Despues un comision di evaluacion ta evalua cada solicitud si nan ta cumpli cu tur rekisito y condicion pa duna un conseho na minister di Salubridad Publico, kende finalmente ta esun cu ta otorga e permiso necesario pa cultiva, importa, procesa y exporta cannabis medicinal.

Bureau Medicinal Cannabis

El a splica cu tin diferente modelo di negoshi rond di e actividad aki. Tin algun grupo cu ta interesa solamente den cultiva e cannabis y exporta e producto. Mientras otro kier importa e materia prima y procesa esaki, y despues export’e. Tambe tin grupo cu kier importa e azeta, proces’e y exporta e azeta bek di un manera mas refina.

 

Gobierno mester lanta full un departamento y nan a institui e departamento cu ta yama Bureau Medicinal Cannabis. E landsbesluit a keda aproba den Conseho di Minister y manda na Gobernador na spera cu e por firm’e. Tambe gobierno mester busca e personal necesario pa maneha e departamento aki.

Paralelo na esaki mester cambia y adapta e ley cu ta legalisa e actividad aki, pero ainda e ta na Raad van Advies pa duna su comentario y conseho. Ainda gobierno ta wardando riba nan. Unabes cu gobierno ta ricibi e consehonan y traha riba nan, e ley lo wordo manda pa Parlamento pa debati riba dje. “Nos ta convenci cu nos lo por aproba e ley aki, hunto cu e lantamento di e Bureau Medicinal Cannabis.”

Minister Dangui Oduber ta spera cu cannabis medicinal por bira e pilar economico di cual tanto ta papia. Tambe cu e por crea e cupo di trabao y entrada cu gobierno ta premira cu e industria aki lo por genera pa pais Aruba.

LEAVE A REPLY

Please enter your comment!
Please enter your name here