A pone e prome piedra pa e prome cancha di tiro di Polis

Dialuna mainta a pone e prome piedra pa loke ta bay bira e prome “Schietbaan” di Cuerpo di Polis.  Alto Comisario mr. Adolfo “Dolfi” Richardson a splica cu esaki ta un proyecto cu cual Cuerpo Policial tabata ocupa cu ne pa varios aña caba. Esaki ta e comienso di e “Schietbaan” of cancha di tiro y ta un momento importante pa e organisacion policial. E cancha di tiro aki ta traha a base di e exigencianan moderno cu ta wordo poni pa e tipo di canchanan asina.

“Cuerpo Policial por ta hopi orguyoso di tin un cancha asina. Mi ta spera cu nos lo haci un bon uzo di dje den futuro. Esaki ta un di e exigencianan pa bo bira Polis. Bo mester sa con pa domina un arma di candela. Mi ta kere cu akinan tur e instruccionnan lo wordo duna”, asina Alto Comisario Richardson a subraya.

Banda di esaki el a expresa palabranan di gradicimento pa e team cu a traha pa realisa e proyecto aki. No tabata un trayectorio facil, el a bisa, mirando cu ta algo hopi complica pa bin cu un cancha. Mester tene cuenta cu hopi faceta. E hefe di Polis a gradici Marina Real cu a asisti Cuerpo Policial den esaki y cu den futuro ta bay bira un cancha cu ta cumpli cu e exigencianan di awendia.

Cuerpo Policial tin un tereno na disposicion unda no solamente lo bin un cancha, aunke pa awo solamente lo tin un cancha di tiro. Na dado momento lo amplia esaki cu un espacio unda lo por train cu e arma di candela cu diferente procedura. Tambe e ekipo special di Polisnan uzando cacho K9 lo por haci uzo di e facilidadnan mescos cu e otro unidadnan special, di acuerdo cu Alto Comisario mr. Adolfo “Dolfi” Richardson.

Financiamento di e edificio mas dos cancha di tiro profesional pa Polis situa na Vader Piet na San Nicolas ta den man di Fondo Desaroyo Aruba (FDA), mientras cu e compania di construccion BOHAMA ta encarga cu e trabounan, bou supervision di DOW.