6oct parkeer meter posponi hotel.jpg

ORANJESTAD – E decision pa instala parkeer meter den e zona hotelero no lo wordo ehecuta inmediatamente a pesar cu ya caba DOW a cuminsa traha riba e area cu lo wordo reserva pa e proyecto aki.

Minister Otmar Oduber a declara ayera cu nan ta kere cu lo introduci parkeer meter den e zona hotelero pa final di e aña aki of cuminsamento di 2016. El a informa cu e mesun orario lo wordo manteni, ya cu no ta husto pa tin un competencia inhusto, y p’esey nan lo pone e mesun orario cu ta stipula pa centro di ciudad, kiermen for di 7or di mainta pa 7or anochi.

Sinembargo el a informa cu na momento cu e proyecto di parkeer meter ta cuminsa den e zona hotelero, e orario nobo cu lo drenta na vigor ta bay ta te 11or anochi. E ora ey e areanan di Oranjestad lo bay den e mesun orario aki di 11or di anochi, kiermen di 7or anochi e lo wordo hisa pa 11or anochi.

E extension aki tin di haber cu aspecto di siguridad. Tambe nan a cuminsa traha riba e parti di iluminacion. E ta kere cu na e momento aki basta di e feedback cu ta wordo ricibi, nan ta haci uzo di nan pa haci e adaptacionnan cu nan ta sinti cu ta responsabel y cu ta yuda den e proceso pa e hendenan tambe por custumbra.

Encuanto e preocupacion cu Camara di Comercio y Industria (KvK) a refleha riba e forma con e proyecto a wordo introduci y e caida di e bentananan, e mandatario en cuestion a indica cu tin puntonan cu nan lo atende cu nan. Igualmente el a laga sa cu nan no ta subestima ningun di e inkietud cu a wordo refleha. Te hasta e accion di firma cu a tuma luga y cu ainda e no a haya ya cu aparentemente nan ta den man di Notario actualmente, nan lo tene cuenta cu ne.

LEAVE A REPLY

Please enter your comment!
Please enter your name here