Dia 16 di juni, e Comision di Turismo di Parlamento a tene un reunion cu CEO di Aruba Tourism Authority (A.T.A.), Sra. Ronella Croes, CFO Sr. Maas van Drie y Business Manager di A.T.A. Sra. Dyane Vis-Escalona, den cuadro di presentacion di e rapport anual di A.T.A. pa e aña 2024. E reunion aki tabata resultado di un peticion formal di e comision, cu a expresa deseo pa haya un presentacion directo di parti di A.T.A.

Conforme ley, A.T.A. ta entrega su rapport anual prome cu 1 di april na e Hunta di Supervision anualmente, kende ta revisa esaki. Despues, e rapport anual ta ser entrega na Minister di Turismo pa revision adicional, unabes cu Hunta caba di revisa esaki. Mescos cu e presupuesto di A.T.A., e rapport ta bay Parlamento di Aruba unda e ta keda un minimo di 10 dia di trabao pa e miembronan por evalua, haci pregunta y duna comentario si ta necesario. Esaki despues cu Minister di Turismo a revisa y ta OK cu e documento.

Puntonan principal presenta pa A.T.A

Durante e reunion, A.T.A. a brinda un presentacion amplio y detaya tocante su esfuerso den Marketing y Promocion (incluyendo Norte America, Latino America, y Europa). Tambe a amplia riba logronan di esfuersonan riba nos isla pa mehora y desaroya e producto turistico. E presentacion a inclui estadisticanan relevante di turismo, desaroyonan den e sector y e impacto economico cu turismo tin riba Aruba.

Miembronan di e Comision di Turismo di Parlamento a puntra nan pregunta y a expresa cu nan a keda satisfecho cu e respuesta y e informacion presenta. A.T.A. ta gradici pa e oportunidad. Dialogo constructivo asina ta contribui na un miho comprension di e desaroyo y reto den e sector di turismo y como tal pa nos pais den su totalidad.

Den un comunicado di prensa, parlamentario Jennifer Arends-Reyes (AVP), miembro di e comision, a informa cu segun e ultimo rapport anual di ATA, Aruba a logra un aumento di 13% den bishita di turista cu keda, elevando e cifra total na mas di 1.4 miyon, e cifra mas halto desde 2011. Pero mas importante ainda ta e enfoke renoba riba sosten e turismo den harmonia cu nos medio ambiente, comunidad y economia.

Arends-Reyes a destaca cu mientras cu turismo ta keda e motor principal di nos economia, e preocupacion pa “overtourism” ta subi den comunidad. “E hecho cu 68% di e encuesta local ta sigui satisfecho cu turismo ta positivo, pero nos no por ignora cu esey tabata 78% den 2018. Nos comunidad ta wak e necesidad pa mas balans y sostenibilidad,” el a indica.

ATA a tuma un paso esencial cu e desaroyo di e Multi-Annual Corporate Strategy (MACS) 2025-2035, cu ta delinea un bista largo pa un turismo regenerativo. “Nos no kier solamente un turismo cu ta responsabel, nos kier un cu ta duna back mas cu loke e ta tuma – un turismo cu ta lanta nos naturaleza, cultura y bienestar social,” segun Arends-Reyes.

A.T.A. a sigui trahando riba manera di midi movecion di bishitantenan y distribui e fluho pa evita presion innecesario riba nos atraccionnan turistico. Sensor nobo a wordo instala na luganan strategico, y e informacion ta yuda pa mehora maneho y experiencia pa e turista, mientras cu e carga riba e isla ta keda controla. Ademas, e president di e comision di turismo a enfatisa cu un modelo di turismo High- Value, Low-Impact ta e unico manera pa preserva Aruba pa generacion futuro.

E comision parlamentario lo sigui monitor e implementacion di e strategia nobo y ta disponibel pa traha man na man cu ministerio di turismo, ATA y sector priva pa un producto Aruba cu ta realmente sostenibel.