(AP) — Polis a tira gas lagrimogeno riba manifestantenan na Congo ayera, despues cu decenas di persona a participa den un protesta no autorisa na Goma contra e presencia di trupanan stranhero pa purba combati violencia di gruponan arma.
Autoridadnan despues a detene algun participatne, como tambe algun periodista cubriendo e protesta.
Lidernan di Comunidad Oost Africano di siete nacion a resolve aña pasa pa crea y lansa un forsa regional na Congo oriental, unda e grupo rebelde M23 ta culpa pa aumento den violencia.
Trupanan Kenyano a yega fin di aña pasa, y otro contingente for di Sur Sudan tabata spera den proximo dianan. Sinembargo, e trupanan a enfrenta oposicion di algun Congoles. “Ehercito Kenyano a bin aki como turista. Nan ta bay rond di e pueblo tur dia y nan ta haci absolutamente nada,” manifestante Gloire Bagaya a bisa. “Anos como poblacion a bin hunto pa bisa no na e forsa regional aki. [E Sur Sudanesnan] tambe tin guera na cas, pero nan ta bisa cu nan kier trece paz na nos pais,” Bagaya a bisa. “Esaki ta un complot internacional cu kier Balkanisa nos pais, y niun hende ta bay dividi nos pais.”
M23 a resurgi na Congo oriental un aña pasa despues di un decada di inactividad. Congo ta acusa Rwanda di sostene e grupo rebelde militar, algo cu Rwanda ta rechasa.
Como parti di un acuerdo cera na Angola aña pasa, e grupo a bisa cu ta bay retira su hendenan for di algun di e teritorionan ocupa prome cu dia 15 di januari. Sinembargo, ainda tin areanan bao su control.
E bataya ta exacerbando e crisis humanitario na Congo oriental. Casi seis miyon persona ta desplaza internamente na e pais,c u mas di 450mil desplaza na e provincia Nort Kivu desde cu e bataya a escala na februari.
