Corte den Prome Instancia a trata ayera e caso penal contra e sospechoso J.K.F., kende ta ser acusa di a causa un accidente di trafico riba prome di december 2023 na Savaneta, cu consecuencia mortal.
Despues di e accidente el a huy sigui core; e no tabatin rijbewijs tampoco. Un pareha di turista cu a caba di yega Aruba a resulta gravemente herida. Un di e victimanan (75 aña di edad) a fayece e dia siguiente di e heridanan cu el a sufri.
E sospechoso a declara cu e tabata core un tiki mas cu 80 kilometer pa ora riba un caminda unda e velocidad maximo permiti ta di 60 kilometer pa ora.
Tabata anochi scur y e tabata core cu bentana getint preto preto (cu 6% transparencia envez di e minimo di 70% cu ta permiti). Fiscal di Husticia a compara esaki cu core cu wowo mara! E sospechoso ni tin rijbewijs, anto pa colmo el a yega di ser persigui penalmente mas biaha den pasado pa core sin rijbewijs.
E pregunta huridico den e caso ta:
e accidente a sucede directamente a consecuencia di e erornan cu J.K.F. a comete den trafico?
of e lo por a sucede cu cualkier otro chofer cu si tabata core cu cuidao?
E hechonan y circunstancianan na e sitio di e accidente ta importante ora di contesta e pregunta aki. No ta suficientemente duidelijk con y na cua momento e pareha a crusa caminda. Door di esey no por bisa cu seguridad cu e accidente mortal ta a consecuencia di e comportacion peligroso di e sospechoso. Ministerio Pubico ta conclui cu no tin bastante evidencia pa comproba homicidio culposo.
Ministerio Publico ta haya cu ta si comproba cu e sospechoso a core peligrosamente. Ademas ta acus’e di a core sin rijbewijs y di a bandona e sitio di e accidente.
Ministerio Publico ta tuma e sospechoso na malo cu el a comete tanto eror den trafico, mas aun cu el a yega di ser condena caba pa core sin rijbewijs den pasado. Core sin rijbewijs ta forma un peliger grandi pa seguridad den trafico. Ministerio Publico ta tum’e hopi na malo tambe cu el a huy for e sitio di accidente y a laga e personanan pa nan cuenta. Famia di e fayecido tin cu sigui biba cu e perdida di nan ser stima.
Hues a dicta sentencia mes ora den e caso. El a condena J.K.F. pa un castigo di prison di 10 siman, di cual ocho siman ta condicional, cu un tempo di prueba di tres aña, y 80 ora di trabao pa comunidad y un prohibicion di core auto pa un duracion di 2 aña, pa causa peliger, core sin rijbewijs y bandona sitio di un accidente.
E sospechoso a ser declara liber pa homicidio culposo. Hues a dicidi cu J.F.K. lo no haya su auto bek.
