(AP) — Montaña Fuji no a rementa desde 1707. Pero pa Dia di Preparacion pa Desaster Volcanico, oficialnan di Hapon a publica videonan genera pa AI cu ta mustra un simulacion di un posible erupcion violento di e volcan activo.
E video di e Gobierno Metropolitano di Tokyo ta adverti cu un erupcion por sucede “na cualkier momento, sin aviso,” describiendo as volcanico cubriendo centro di Tokyo, aproximadamente 100 kilometer leu, dentro di un par di ora, paralisando transporte, interumpiendo cuminda y energia y causando problema respiratorio den largo plazo.
E video ta termina cu e mensahe: “Nos tin cu arma nos mes cu hecho y prepara pa desaster den nos bida diario.” E ta mustra e cabinet di un famia prepara cu cuminda den lata y un kit di prome auxilio.
Gobierno di Tokyo a bisa den un declaracion cu actualmente no tin ningun señal di Fuji rementando. “E simulacion ta diseña pa prepara residente cu informacion corecto y medida di preparacion cu nan por tuma dn caso di un emergencia,” el a esplica.
Representante di e Gobierno Metropolitano di Tokyo y e Division di Prevencion di Desaster di e Oficina di Gabinete di Hapon a bisa cu nan no a ricibi reclamo for di residente di Tokyo tocante e videonan.
Hapon ta altamente vulnerabel na desaster natural debi na su clima y topografia y ta conoci pa su planeamento di desaster consciente cu ta cubri teremoto, tifon, inundacion, derumbo di tera y erupcion volcanico.
E Agencia Meteorologico di Hapon na augustus aña pasa a emiti su prome “conseho di megateremoto” despues cu un teremoto poderoso a golpia e costa sureste di e isla principal sur di Kyushu.
Di aproximadamente 1.500 volcan activo di mundo, 111 ta na Hapon, cu ta situa riba e “Renchi di Candela” di e Pacifico.
Fuji, e punto mas halto di Hapon, tabata rementa aproximadamente cada 30 aña, pero ta drumi desde siglo 18.
