Casi hunto cu e anuncio cu Gobierno di Reino a ricibi un conseho di CAft pa duna gobierno di Aruba un ‘aanwijzing’ a bin e noticia cu a cay e decision cu no lo tin reinstitucion di e recorte salarial, e 5% cu lo a bolbe caba na fin di juni, pero no a bira realidad. Henter e situacion ta mustra nos un biaha mas cu na e isla aki por pretende di haci hopi cos riba nos mes, manera cu no tin supervision financiero, te dia cu e supervision impone su mes. Esey tabata e caso den e ultimo lunanan unda cu cada biaha ta haci como si fuera Hulanda ‘ta haci fastioso’ y ta stroba gobernacion na Aruba.

 

Sin embargo, nos a yega na e punto unda tin intervencion di e nivel superior di supervision financiero. Esey no mester ta un sorpresa; tin supervision desde 2014 y awor ta actua. Na e momento aki tin un situacion den cual ta apropia pa interveni den nos presupuesto. Naturalmente gobierno di Aruba tin un opinion contrario, pero nos mester observa e hechonan y warda decision di Conseho di Ministro di Reino, pasobra awor ainda no tin un ‘aanwijzing’, solamente un recomendacion di CAft pa haci tal. Sin embargo, e no aprobacion di e 5% di salario di empleado publicom riba su mes un baño di awa friu, ta indica mas mal tempo.

E medida cu por keda tuma por trata ademas di presupuesto di e aña aki, tambe e perspectiva financiero cu gobierno a pinta den e presupuesto multi-anual, cu ta parti obligatorio di e presupuesto. Lamentablemente un parti chikito di publico ta haya e proyeccion aki te 2026 pa mira, aunke e ta disponible riba website di CAft y e medio aki tambe a publica e resumen. E tabel clave ta papia pa su mes; e mensahe di gobierno ta desafiante: “Nos no ta baha gasto y nos ta aumenta entrada drasticamente, principalmente via un BTW y impuesto directo cu no ta baha. Nos ta keda core un deficit anual te 2026, punto.” Y esaki ta exactamente loke CAft a trece dilanti den nan ultimo recado di prensa, esta cu gobierno di Aruba ta insisti den no baha gasto y di otro banda ta keda pone enfasis riba aumenta entrada. Y nos por sa di unda e aumento di entrada ey ta bin: di un asalto mas riba cartera di e ciudadano.

Bo por tuma un actitud beligerante asina pa sigura voto cu bo tin caba di bo fielnan politico, pero en general y den e confrontacion cu e supervisor financiero – gobierno di Reino, y no CAft – esaki no ta un ruta viable pa yega na exito. Ta di comprende cu un gobierno local nunca lo bay di acuerdo sin mas cu loke e nivel superior ta propone, lo bo mustra demasiado manso, pero bo ta desafia no mester keda sorprendi ora e reaccion ‘di ariba’ bin. Y nos no ta kere tampoco cu gobierno ta sorprendi den e caso aki, pasobra hustamente e intervencion aki ta conveni nan politicamente. Esaki ta duna gobierno e oportunidad pa bisa: “ Nos kier a defende boso interesnan, pero nan (Hulanda) a dicidi otro.” Y esey supuestamente mester libera gobierno di responsabilidad pa e medidanan na caminda. Y nos ta mira esaki caba den maneho di e asunto di eliminacion di e recorte salarial. Ta priminti para fuerte pa duna e empleado publico full su salario back, pero seguidamente no ta cumpli cu e exigencianan cu Hulanda a pone. Y aki por cierto historia ta ripiti, pasobra mescos cu algun aña pasa a torpedea e cambionan den e ley di supervision financiero cu gobierno a palabra den e protocol di 2018, eliminando supervision di Reino den e ley, awor parlamento a modifica e ley di moderacion di salario pa ehecutivo halto den sector publico di tal manera cu e no ta efectivo mas. De repente tambe e mayoria gubernamental den parlamento a corda cu nan ta “e organo mas halto di Aruba” y ta dicidi pa nos loke ta supuestamente mihor…

No ta posible pa nan mantene e actitud aki henter aña, den tur asunto? Anto nos lo ta riba caminda pa mehoracion drastico di funcionamento di e organo cu poco dia pasa den un conversacion priva un persona a yama “no parlamento, sino por lamento…”.

Di otro banda, ta importante pa mas wak mas leu den futuro. Un eventual aanwijzing – no tin uno ainda – lo bay dicta e ambiente pa colaboracion den futuro. Si awor caba nos Promer Ministro ta haya cu e trato cu e y su gobierno ta haya di Reino ta haci cu e no ta sinti su mes mas parti di Reino, esey ta core pa su responsabilidad. En realidad e no ta nada mas cu fomenta sentimento negativo contra e supervision di Reino, cu t’ey pa un motibo. Bo no por tin un Reino di cual nos tur ta parti, mientras e Reino ey na nivel maximo no tin instrumento di control. Nos Promer Ministro sa esey tambe, sinembargo ta scoge pa fomenta sentimento falso y innecesario nacionalista y insular cu na e momento aki no ta yuda pa nada. Algun tempo pasa el a acepta caba – silenciosamente – cu 2023 lo ta e aña cu mester mustra presupuesto balanza. Y ta logico cu bo mester cuminza ‘pone brake’ e aña aki caba riba gasto. Pero esey e no kier a conta…, y awor otro a papia.

LEAVE A REPLY

Please enter your comment!
Please enter your name here