(AP) — ABC a suspende Late-Night Show di Jimmy Kimmel indefinidamente cuminsando diaranson despues di comentario cu el a haci tocante e asesinato di Charlie Kirk, comentario cu a causa un grupo di stacion afilia di ABC pa bisa cu no lo transmiti e show y a provoca algun comentario di un regulador federal superior.
E comico veterano nocturno, a haci varios comentario tocante e reaccion na e asesinato di e activista conservador siman pasa riba “Jimmy Kimmel Live!” dialuna y diamars anochi, incluyendo cu “hopi den tera MAGA ta traha masha duro pa capitalisa for di e asesinato di Charlie Kirk.”
ABC, kende ta transmiti e show nocturno di Kimmel desde 2003, a move rapidamente despues cu Nexstar Communications Group a bisa cu lo retira e show cuminsando diaranson. E comentarionan di Kimmel tocante e morto di Kirk “ta ofensivo y insensitivo na un momento critico den nos discurso politico nacional,” a bisa Andrew Alford, presidente di e division di transmision di Nexstar. Nexstar ta opera 23 afiliado di ABC.
No tabatin ningun comentario inmediato for di Kimmel, kende su contracto ta termina na mei 2026. E declaracion di ABC no a cita un motibo pakico su show a ser preveni.
Presidente Donald Trump a celebra e decision di ABC riba su plataforma di red social Truth Social, skirbiendo: “Felicitacion pa ABC pa finalmente tin e curashi pa haci loke mester a ser haci.”
Mas tempran den e dia, e presidente di FCC Brendan Carr a yama e comentarionan di Kimmel “realmente malo” y a bisa cu su agencia tin un caso fuerte pa responsabilisa Kimmel, ABC y e matriz di red Walt Disney Co. pa plama desinformacion. El a bisa cu e comico tabata parce haci un esfuerso intencional pa gaña e publico cu e asesino di Kirk tabata un partidario di Trump derechista.
Durante su monologo di anochi dialuna, Kimmel a sugeri cu e presunto asesino di Kirk, Tyler Robinson, por a tabata un republicano pro-Trump. “E Gang MAGA ta desesperadamente purba caracterisa e mucha homber aki cu a asesina Charlie Kirk como cual kier cos menos un di nan y haci tur loke nan por pa anota punto politico for di e mucha aki,” Kimmel a bisa. “Entre e tiramento di culpa, tabatin dolor.”
“Esaki ta un asunto hopi, hopi serio awor pa Disney,” Carr a bisa riba e podcast di Benny Johnson. “Nos por haci esaki e manera facil of e manera dificil. E companianan aki por haya manera pa tuma accion riba Kimmel of lo tin trabao adicional pa FCC mas laat.”
Autoridad ta bisa cu e homber di 22 aña a crece den un cas conservador na parti sur di Utah pero tabatin interaccion den “ideologia di iskierda.” Su mayornan a bisa investigador cu el a bira politicamente iskierdista y pro-derecha LGBTQ den e ultimo aña. Su status di votante ta inactivo, loke ta nifica cu e no a vota den dos eleccion general regular. El a bisa su compañero transgenero cu el a tuma accion contra Kirk pasobra el “a cansa di su odio.”
