Mediante un comunicado di prensa Ministerio Publico (OM) a informa cu Corte Comun di Husticia a dicta sentencia ayera den e caso di apelacion cu parlamentario y candidato pa minister Mike de Meza a entrega contra OM.

Den su sentencia, Corte Comun di Husticia a rechasa e peticionnan cu De Meza a entrega den su caso di apelacion contra e decision di hues di Corte di Prome Instancia di dia 17 di juli 2025, den cual hues a rechasa e peticionnan di De Meza pa obliga OM pa inform’e mas tocante e sospechonan contra di su persona y pa tuma un decision di persecucion den su caso penal prome cu 15 di augustus 2025.

Segun OM ta indica, Corte Comun di Husticia ta di acuerdo cu e apelacion di De Meza no ta no admisibel, pa motibo cu abogadonan di De Meza a entrega e apelacion aki laat, y debi na e eror aki, Corte Comun di Husticia no por trata e apelacion di De Meza contra e decision di hues di Corte di Prome Instancia.

Diamars ultimo, parlamentario De Meza hunto cu su ekipo legal, lidera pa abogado Desiree Croes, tabata den corte pa tratamento di e caso di apelacion cu e parlamentario a entama contra OM despues di e sentencia di hues di Corte di Prome Instancia.

Na salida di corte diamars atardi, tanto abogado Croes como parlamentario De Meza tabatin bon sentimento y hasta indica cu pa loke ta e contenido di e caso, e huesnan tabatin “hopi comprension” pa De Meza.

Di su banda De Meza a indica cu su abogadonan a duna full e splicacion y cu el a keda sumamente contento cu e trabao cu nan a bin ta haci. El a splica cu durante e tratamento di e caso di apelacion, e tres hues a puntr’e si e tabata kier a duna su punto di bista, cual el a haci y a splica nan kico e ta pasando aden.

Contestando pregunta tocante si e ta sinti cu si e por a haci algo miho of si e ta sinti cu el a haci algo cu no tabata corecto cu awor ta pone cu e ta den e situacion aki, De Meza a sigura cu pa 30 aña caba e tin oficinanan di accountant ta haci tur su cosnan di impuesto. “Mi mes no ta experto den esey y p’esey eigenlijk tin e oficinanan di accountants, specialistanan di belasting y pa 30 aña nan semper a yena tur mi cosnan pa mi. Ami no ta sinti cu mi lo a haci algo robes si tabatin un omision of algo,” el a enfatisa.

De Meza a indica cu e lo continua eherce su trabao como parlamentario y presenta pueblo. Ademas el a sigura cu e ta dispuesto pa sigui lucha si ta necesario y ta dispuesto pa hiba e caso aki te na Corte Europeo si tin mester. No ta conoci ainda kico ta bira e siguiente pasonan pa De Meza y su ekipo legal.

Manera ta conoci, origen di e saga aki ta e hecho cu e trayecto di proceso di screening di candidato pa minister Mike de Meza a ser alarga, pa motibo di diferente contratiempo cu a pone un impasse den e nominacion di De Meza, cual ainda e y su ekipo legal ta luchando pa resolve.

Den luna di juni a bira conoci cu DIMP a entrega un caso penal contra De Meza, tocante cual OM inicialmente no a duna clarificacion na Sr. De Meza. Pa e motibo aki, De Meza a entrega peticion na corte contra OM. Segun De Meza, den su mesun declaracion, el a tende di formador cu OM a mark’e como sospechoso den e caso entrega pa DIMP. El a pidi hues pa duna ordo na e instancia pa clarifica e tipo y motibo di e sospecho contra dje. Den un decision emiti dia 25 di juni, hues a afirma su opinion cu ciudadanonan cu ta marca como sospechoso tin derecho pa sa pakico nan ta sospechoso y ki tipo di investigacion ta tumando luga contra nan. Sinembargo, esaki ta solamente si e persona envolvi ser oficialmente deteni, interoga of invita pa interogacion.

Den e caso di De Meza, esaki no a sucede.

Hues a splica e tempo ey cu OM no a emiti un declaracion oficial den cual a marca De Meza como sospechoso, pues nan no ta obliga ainda di duna e tipo y motibo di e sospecho contra dje.

Na otro banda, hues a reconoce e naturalesa precario di e caso aki, unda por papia di circunstancianan excepcional y peso—ya cu De Meza tabata nomina como minister—cual lo por exigi pa acelera e clarificacion. Pues hues a dicidi cu OM tin dos siman tempo pa duna un clarificacion na De Meza si e ta sospechoso den un investigacion y e articulo den ley pa cual e ta sospechoso, cual De Meza y su ekipo no a keda satisfecho cune.

Dia 17 di juli ultimo, hues a entrega su decision relaciona cu e peticionnan cu De Meza a entrega na Corte di Prome Instancia. E peticion di e ex-minister, ken tabata ta den nominacion pa bira minister den e gabinete nobo di AVP-FUTURO, a pidi pa clarificacion tocante e tipo y e motibo di e acusacionnan cu Ministerio Publico (OM) tin contra dje. Ademas, De Meza a pidi OM pa tuma un decision si ta persiguie of no prome cu 15 di augustus 2025.

Den su decision hues a splica cu OM a cumpli cu e decision di Corte di 25 di juni 2025, door di informa Mike de Meza riba e mesun dia ey cu e ta sospechoso den un investigacion cu tin andando y a pon’e na haltura di e articulo den ley riba cual e sospecho contra dje ta basa. Tambe hues a rechasa e peticion pa OM duna contesta prome cu 15 di augustus tocante un posible persecucion. Segun hues, e peticion aki ta di considera prematuro.

E meta principal di e casonan cu De Meza ta trece dilanti pa ta trece un resolucion definitivo den e henter e situacion alrededor di su nominacion pa minister, pa e por huramenta como e di siete minister di Gabinete AVP-FUTURO. Mientras tanto, gobierno a nombra Sr. Gervais “Baba” Rene Herdé como minister temporal cu lo tuma cartera di Infrastructura, Energia y Telecomunicacion—originalmente reserva pa De Meza. Prome cu e nombramento di Herdé, dr. mr. Arthur Dowers tabata encarga cu e carteranan aki.