Den e ultimo simannan a mira atrobe un serie di varios accidente di UTV of quadracer (ATV) unda turistanan ta perde control y ta bolter, resultando herida. Esaki no ta un fenomeno nobo, ya cu a reporta varios biaha caba e problemanan cu uso di UTV y ATV ta crea pa ciudadanonan, naturalesa y awor seguridad di e usuarionan mes. Tur esaki ta trece un pregunta importante pa dilanti: Ki sorto di medidanan ta ser aplica pa garantisa seguridad di usuarionan di UTV/ATV?

Na 2021, e gobierno anterior di MEP-RAIZ a indica cu a institui un comision multidiscipliniario y un taskforce pa atende cu e problema di UTV/ATV. Na juli 2022, a señala cu a cuminsa cu trabao pa aborda maneho di UTV/ATV, cuminsando cu rutanan alternativa pa proteccion di nos naturalesa. Na 2024, a anuncia un proceso di transicion di tres aña, unda entrante 1 di januari 2025, lo apunta tres ruta alternativo, regula desorden y velocidad.

Desde e tempo ey, no a tende mas for di gobierno tocante e proceso y kico tur realmente a ser logra, specialmente pa loke ta trata seguridad. Bon Dia Aruba a acerca minister actual encarga cu e asunto aki, mr. drs. Arthur Dowers, tocante e proceso di transicion aki y con a sigui cune, pero te ciere di e edicion aki, no a logra haya contesta.

Aunke a menciona ampliamente tocante e consecuencianan cu UTV/ATV tin riba naturalesa y disturbio publico—ambos di cual ta puntonan critico den e discusion aki, mester considera tambe e consecuencianan riba seguridad di tanto ciudadanonan y usuarionan di e vehiculonan aki, cual usualmente ta turistanan.

Den e ultimo dos siman cu a pasa, a mira noticia di al menos cuatro accidente cu ATV y UTV, unda usuarionan a perde control di nan vehiculo y a bolter. Den tur cuatro caso, tabatin mester di asistencia di ambulance, cual mester a hiba tur cuatro victima hospital.

Na comienso di aña 2025, tambe nos a mira un serie di accident cu e tipo di vehiculonan aki, unda atrobe a mira e mesun fenomeno di perde control y bolter. Incidentenan frecuente asina ta crea preocupacion pa ciudadanonan cu tambe por ta victima di accidentenan cu turista riba UTV/ATV, pero alabes tambe ta subraya un posible falta di protocol di seguridad di cierto companianan cu ta verhuur UTV y ATV pa maneho di e tipo di vehiculonan aki.

Den Bon Dia Aruba su investigacion tocante protocolnan di seguridad pa uso di UTV/ATV, a studia tres diferente website di companianan popular riba e isla cu ta verhuur y ofrece tournan di UTV/ATV. Ademas di informacion basico manera limite di edad y peso, dos website ta menciona cu ta recomendable pa hende cu dolor cronico di lomba of cu ta estado no tuma parti den tour of no maneha e vehiculonan aki. Tambe ta menciona cu usuarionan mester por touch e fondo di vehiculo cu pia plat. Banda di esey, interesadonan ta rekeri di ta den posesion di rijbewijs. Un reportera a acerca un di e companianan aki pa puntra mas tocante nan protocol di seguridad y con e compania ta controla cu en berdad usuarionan por maneha e vehiculonan aki, pero no por a ricibi un contesta cla tocante esaki.

Mester nota cu vehiculonan UTV/ATV no ta core mescos cu auto. Aunke UTVs ta diseña pa parce mas manera con un auto ta core, ATVs ta mas parecido motocicletanan, cual tecnicamente ta rekeri otro tipo di rijbewijs. Ademas, aunke ATVs ta diseña pa core ‘off-road’, no ta cla si turistanan cu ta usa e vehiculonan aki tin experencia coriendo den paisahenan mas bruto manera e costa di Aruba. Pues tin cierto factornan chikito cu ta di importancia ora ta maneha e tipo di vehiculonan aki, di cual no ta sigur si companianan di UTV/ATV tours ta controla adecuadamente.

Kisas tambe tin cu considera e guia di tour guides. Den luna di maart 2024, Bon Dia Aruba a reporta cu mediante un video publica ariba su pagina di Facebook, Sr. Greg Peterson di Aruba Birdlife Conservation a mustra con e guianan turistico ta mustra e turistanan con pa haci “spinning” cu vehiculonan ATV, mientras cu e turistanan tambe ta purba haci esaki na e mesun sitio y despues e actividad ta bolbe ripiti cu e siguiente grupo di turista na e mesun localidad.

Esaki ta crea un otro situacion peligroso—atrobe ambos pa ciudadano y turistanan. Pa loke ta experencia y conocemento di e tour guides, no ta cla tampoco ki sorto di rekisito nan mester cumpli cune y ki sorto di reglanan y protocol nan mester tene cuenta na dje como persona principalmente responsable pa usuarionan di UTV/ATV. Ademas tin cu menciona cu companianan di rental di UTV y ATV tambe ta permiti usuarionan huur e vehiculonan aki pa core rond Aruba sin guia profesional.

Turismo semper lo keda un pilar economico importante pa Aruba, y den esaki, turismo aventurero ta keda un parti central pasobra cu esaki ta trece hopi atraccion di bishitantenan y pues ta yuda stimula economia di Aruba. Sinembargo, e critica cu esaki a trece den e ultimo añanan no por keda sin ser atendi cune. Kisas lo ta importante pa reevalua e maneho di UTV y ATV, y, den casonan di accidente, protocolnan di seguridad pa uso di e vehiculonan aki.