Accion Ambiental ta urgi gobierno pa no traha hotel riba Sero Colorado

E tunnel bou tera situa na altura di e casita na Baby Beach mester ta protegi, segun Accion Ambiental. E fundacion ta enfatisa y urgi na gobierno pa no desaroya e area aki mirando su importancia historico y ambiental.

Marcos Bislip, Presidente di Fundacion Accion Ambiental ta expresa cu e mapa original di Sasaki Plan di Sasaki Associated ta pone bon cla cu e areanan aki mester keda preserva. Areanan marca pa preserva pa cu a mapa di Sasaki ta full e baranca grandi panort di Baby Beach te cu Sero Colorado, full e area rond y cerca di ex-hospital di Lago, tambe unda kier a bin cu e race track y full e otro banda di caminda te na e cura di Lago esta e refineria ta marca como area pa preserva.

Pero dicon ta asina importante pa preserva e area? Banda di e balor historico cu Aruba lo perde den forma di un tunnel coba na man, e tunnel aki ta provee e mangelnan den area di Baby Beach awa bou tera. “Na unda cu kier traha e hotel riba e baranca ta pasa bou di e baranca cuebanan y e famoso tunnel di awa Mangel Cora Well, cual a wordo coba na man, cu ta algo historico di Aruba y e parti natural ta cu e awa ta awa di lama y awasero cu ta wordo filtra naturalmente via di e calichi. E tunnel ta conserva hopi awa di lama y yobida cu tabata wordo uza antes pa e refineria y tambe pa muha mata y e ta e fuente importante via di su benanan pa suministra awa pa e mangelnan na Baby Beach te cu banda di Santana di Cacho.”

Na September 1950 Aruba Esso News a publica un articulo Water for All Time: Mangel Cora Well contribution to Aruba’s Future e tunnel di awa Mangel Cora Well ta 2134 pia di largo, e ta parti di Aruba y Sero Colorado su rikesa natural, historico y cultural.

Fundacion Accion Ambiental ningun momento a haya participacion na e preparacion di e ROP 2019. Fundacion Accion Ambiental a entrega un punto di bista (zienswijze) pero te awe Fundacion Accion Ambiental como NGO ambiental no a wordo acerca, ni a reuni cu Fundacion Accion Ambiental, violando tur palabracionnan haci pa e propio Minister di Infrastructura y Medio Ambiente Otmar Oduber.

E departamentonan a duna luz berde sin cu nan a haci un investigacion profundo di e area y no a duna participacion na NGOnan .Investigacion haci pa Fundacion Accion Ambiental a sali diferente cu DIP y DNM. Fundacion Accion Ambiental ta pidi comunidad pa lanta y defende su naturalesa y un area cu ta preserva for di 1997.