ORANJESTAD – Prome minister, Evelyn Wever-Croes a expresa cu pa basta tempo nan tin un protocol cu ta atende e tema aki, pero te ainda no tin nada concreto. El a bisa cu a haci un apelacion riba e minister di enseñansa Rudy Lampe y minister di Husticia Andin Bikker, pa asina hunto finalisa e protocol, pa motibo cu nan a haci hopi trabou pa yega na locual nan tin aworaki riba mesa, pero no a wordo finalisa.
Nan lo haci esey lo mas pronto posibel y hunto cu e docentenan pa yega na e protocol. Siguridad den scolnan no ta simplemente un mayor cu a lanta man y dal un maestra, prome minister a sigura cu esey ta algo completamente inaceptabel y contra ley.
El a comenta cu nan lo bay busca e condicionnan cu a conduci pa e situacion aki, pero tin di haber cu siguridad di mucha riba tereno di scol, siguridad di docente y siguridad di otronan rond di scol, cu no tin nada di haber cu mucha y docentenan.
El a duna di conoce un plan cu e minister di Asuntonan Social tambe ta envolvi cune, pa motibo cu tin di haber cu e Crisisplan Social cu tambe tin un aspecto aki di cultura, tolerancia y no violencia, y nan ta purba pa haci un tema integral.
Integridad
Wever-Croes a manifesta cu e siman aki tabatin un invitacion di Universidad di Aruba, cu tin un instituto cu ta trata di bon gobernacion y liderazgo, ‘Institute for good governance and leadership’ cu ta organisa encuentronan cu diferente hende den comunidad pa papia di e tema aki. Den reunion ey, Wever-Croes a splica cua ta nan vision y e maneho cu nan ta aplicando. Tambe el a papia di tres pilar, cual e prome ta Bureau Integridad Aruba, e instancia di departamento di gobierno cu ta bay traha riba e aumento di conscientisacion den aparato gubernamental, tambe nan ta acepta un keho of algun reporte riba integridad, nan ta esunnan cu ta bay atende cune.
Dia 1 di october ta e fecha pa institui e bureau aki. Sra. Amalin Flanegein como ‘kwartiermaker’ pa set up y ta den e pleno proceso pa haci esey, y el a afirma cu nan a duna te fin di luna di april pa keda cla cu su trabou. Unabes cu nan tin e resto di e personal, Wever-Croes a comenta cu e oficina lo por habri su porta pa ricibi e prome melding.
E di dos pilar ta e Camara di Integridad cu tin otro tarea, cu ta bay tuma kehonan y e departamento aki ta bay ta proactivo, es decir, prome cu gobierno duna un destaho publico, e camber di integridad lo revisa pa wak si e procedura di e destaho ta bay bon. E proyecto aki Wever-Croes a bisa mester ta cla pa fin di aña aki.
Pa finalisa, el a sigura cu e Codigo Uniforme, cu ta bay conta pa tur compania estatal y semi publico, ta e di tres pilar. Riba e codigo aki ta bay tin un organo cu lo controla si e companianan estatal ta comportando nan mes segun e codigo di conducta stipula, y nan lo duna gobierno conseho riba tema di etica y integridad, si gobierno lo pidi of no.
