Aruba Conservation Foundation (ACF) recientemente a completa un bishita di trabou fructifero na Hulanda. Un biahe den cuadro di e estreno di documentario ‘Turning the Tide’, pero cu un meta mas amplio: pa fortifica colaboracion, crea conexion significativo y amplia e red internacional di ACF pa conservacion di naturalesa na Aruba.

E delegacion tabata dirigi pa Chief Conservation Officer, Natasha Silva, y Business Development, Marketing & Communications Marketing Manager, Edeline Berg.

Proposito y Obhetivo di e Bishita
 E documentario ‘Turning the Tide’ a siribi como e vehiculo cu a trece ACF na Hulanda, pero e bishita tabata tin un proposito mas amplio. E bishita a habri porta pa oportunidad pa hiba dialogo, busca fondo, y traha hunto cu organisacionnan cu tin mesun meta cu ACF, na Hulanda.

E meta di ACF tabata pa:

Subraya Aruba su liderazgo den adaptacion climatico , conservacion di biodiversidad, y restauracion di ecosistema.

Sondea posibel metodonan di fondo y partnernan Europeo pa desaroyo programanan nobo y crecemento en general.

Fortifica e laso cu organisacion di conservacion, institucionnan di investigacion y rednan na Hulanda.

Aumenta conscientisacion pa publico y tambe miembronan di media pa loke ta Aruba su herencia natural a traves di oportunidadnan nobo di comunicacion.

Bishita Strategico y Reunionnan pa Colaboracion
 Fuera di e estreno, ACF a reuni cu diferente partnernan nobo y existente pa intercambia conocemento, comparti miho practicanan, y explora oportunidadnan pa colaboracion. ACF su team a bishita Naturalis Biodiversity Center, unda a reuni cu Dr. Ing. Vincent J. Kalkman, Project Leader Biodiversity Hotspots, kende anteriormente a traha na Aruba riba investigacion di biodiversidad invertebrate (bestianan cu no tin weso di lomba manera barbulet, cangreu, insecto etc.) y cu recientemente a conduci un bioblitz full rond di Aruba.

Na Waardenburg Ecology, e discusionnan a enfoca riba e posibel colaboracion den conservacion marino, maneho di Tern (Sterchi of Bubi), y educacion y conscientisacion di medio ambiente. ACF a reconecta tambe cu Vogelbescherming Nederland a traves di Janske van de Crommenacker, Program Manager pa Caribe Hulandes y siguramente no desconoci na Aruba, pa alinea esfuersonan andando di conservacion di parha. ACF su team tambe a reuni cu director John de Hoon, lider di e team di naturalesa, Johan van der Haven, y biologo Marisa Mangal of Stichting Vogelpark Avifauna, pa discuti e reintroduccion a largo plazo di e Yellow-shouldered Amazon, Lora, na Aruba y posibel programa di broei den futuro.

Finalmente, ACF a bishita Artis Zoo Amsterdam y Diergaarde Blijdorp / Rotterdam Zoo cu a provee oportunidad pa comparti experiencianan di e restauracion y rescate di coral, y programa di broei pa coral den lama, como parti di e programa di conservacion marino cu ta desaroyando den Caribe Hulandes.

“Tur reunion tabata un recordatorio cu conersvacion ta triunfa a traves di conexion,” ACF su Chief Conservation Officer, Natasha Silva a duna di conoce. “E colaboracionnan aki ta yuda nos comparti conocemento, crece capacidad, y ultimamente reenforsa e cooperacion entre ciencia, comunidad, y conservacion den Reino Hulandes.”

Estreno Documentario ‘Turning the Tide’

E bishita pa Hulanda a duna inicio a traves di dos proyeccion di estreno di ‘Turning the Tide’, un documentario di naturalesa unico pa Aruba, documentando Aruba su esfuersonan riba coral y mangel di lama, financia pa EU-RESEMBID Programme y produci den colaboracion cu Wageningen University & Research, ScubbleBubbles Foundation y University of Aruba. E prome estreno a tuma luga na Filmhuis Den Haag y tabata haci posibel a traves di e sosten generoso di Aruba Tourism Authority (ATA), y e di dos estreno na Visum Mundi na Wageningen cual a wordo haci posibel door di Wageningen University & Research.

ACF su bishita na Hulanda a marca un paso importante pa expande e fundacion independiente su colaboracion internacional y posiciona Aruba como un voz proactivo den conservacion di naturalesa.

Hunto cu su partnernan, ACF lo continua na reenforsa trabounan di conservacion ambos riba tera cu bou di lama pa proteha, preserva, y restaura e luga cu nos ta yama cas.