Siman pasa diaranson, dia 7 di mei 2025, Aruba Conservation Foundation (ACF) den colaboracion cu Wageningen University & Research (WUR) a tene un anochi informativo den cual a presenta e resultadonan di un investigacion conduci pa investigadornan di WUR na Hulanda tocante Aruba su naturalesa y e maneranan den cual por implementa medidanan sostenible pa asina proteha y mehora e direccion den cual Aruba su naturalesa ta bayendo.

Bao luznan caluroso na Fort Zoutman, e presentacion a mira un asistencia di varios fundacion, agencianan gubernamental, como tambe amante y activistanan ambiental, y hasta prome minister Mike Eman, ken actualmente tambe tin e cartera di Naturalesa. Presenta pa Dr. Lawrence Jones-Walters y Dr. Peter Verweij di Wageningen University, e anochi a constitui di un programa cu a duna varios fundacion y agencianan gubernamental e oportunidad di forma parti di un panel y discuti varios topico relaciona cu e desaroyo di Aruba su naturalesa.

E investigacion di WUR y ACF ta enfoca riba un vision nobo pa atende e efectonan di cambio di clima, sobrepoblacion y turismo riba nos naturalesa, entre otro. Cu e rapport yama ‘Aruba 2050: A Nature Inclusive Vision’, ACF y Wageningen ta subraya e retonan cu Aruba su naturalesa ta enfrentando y alabes provee un bista di con nos naturalesa por desaroya pa e aña 2050, ademas di duna algun conseho pa implementa medidanan pa asina sostene Aruba su medio ambiente. Dr. Lawrence a enfatisa cu e proyecto aki a dura 2 aña pa completa, y a tuma varios metodo pa colecta data, manera entrevista cu varios fundacion y ciudadanonan, tayernan y tambe trabaonan den tereno y estudio di politicanan ambiental di Aruba. Cu e data colecta, a descubri varios punto di preocupacion pa cu e desaroyo di naturalesa. Entre esaki ta inclui sobrepoblacion y urbanisacion, aumento excesivo den turismo, cambio di clima, cultivacion di productonan local, poder di consumo, energia renobable, cultura y diversificacion economico. E presentacion a toca algun di e hayazgonan aki.

E prome panel di anochi a discuti e reto di mantene, engrandece y restaura naturalesa. E discusion aki a mira representantenan di agricultura, conservacion di bestianan salvahe, como tambe representante di Directie Natuur en Milieu (DNM), cada un treciendo nan preocupacion dilanti specialmente pa cu e falta di liderazgo adecua den e esfuerso pa proteha naturalesa. Sr. Greg Peterson—un di e panelistanan representando Aruba Birdlife Conservation—a compara e situacion actual cu bulando den avion sin capitan den cockpit, subrayando e falta di direccion fiho pa conservacion di Aruba su naturalesa, mientras cu director di DNM, Gisbert Boekhoudt, a subraya e importancia pa tin un vision comun pa asina aborda e retonan ambiental cu Aruba ta enfrentando.

E siguiente panel a atende un topico cu den ultimo añanan a bira un punto di gran discusion y controversia, specialmente riba red social. Aki ta trata di maneho y crecemento di turismo. Durante e ronda aki un punto a resalta entre e discusion, y esaki tabata encera e velocidad den cual mester pusha pa cambio pa asina aborda e problema creciente di sobreturismo aki na Aruba. Aunke tabatin diferente perspectivanan riba esaki—di un banda e representante di ACF, Natasha Silva, a boga pa un acercamento acelera, mientras cu representante di ATA, Patrick Melchiors a argumenta un implementacion mas gradual—a acorda si cu turismo na Aruba a yega un punto critico y cu mester tuma medidanan pa asina yega na un balansa y garantisa cu nos naturalesa ta keda sano y prospero.

Pero no ta solamente e crecemento di turismo tin efecto significativo riba nos naturalesa. Tambe a observa cu e aumento den poblacion y urbanisacion tambe ta causando preocupacion pa e desaroyo di naturalesa. Esaki ta envolvi en particular e areanan sobrepobla na Aruba, manera Oranjestad, Noord y Santa Cruz. Durante e panel aki a discuti specialmente tocante e infrastructura disponible pa por yuda naturalesa florece den e areanan aki. Aki a presenta algun tipnan concreto, manera ‘urban farming’, unda residentenan ta incorpora naturalesa riba nan tereno, sea cu 1 of mas mata di fruta of hardinnan.

E rapport di WUR no ta solamente presenta e retonan cu ta existi awendia, sino tambe ta ofrece un bista den Aruba su futuro. Aki nan a presenta dos alternativa: Un futuro den cual Aruba ta sigui su maneho actual, esta e acercamento di “business as usual” of un futuro cu ta priorisa naturalesa den tur sector y estilo di bida, cu e acercamento “nature inclusive”. Ambos acercamento ta duna un bista resaltante, cu e acercamento di business as usual resultando den un dobel aumento di poblacion turistico, expansion di infrastructura pa acomoda ambos turistanan y trahadornan inmigrante, y un agotacion di Aruba su naturalesa y recursonan manera awa y coriente. E acercamento di nature inclusive ta mira un futuro den cual turismo y e poblacion ta stabilisa, cu un concentracion di eco-turismo, recursonan basa principalmente via metodonan sostenible manera biento y solo, limitacion di construccion innecesario (cu prioridad pa drecha casnan bieu prome) y promocion di productonan local.

Durante e anochi informativo y colaborativo aki a resalta e deseo pa cambionan drastico den e maneho actual den conservacion di naturalesa, den cual un vision comun, liderazgo adecua y medidanan concreto ta hunga un rol sumamente importante pa asina logra un futuro unda e naturalesa y comunidad Arubano ta florece y biba den harmonia cu otro.