Manera a keda conoci for di algun siman pasa, escritor y psicologo di mucha y hoben na Corsou, Achanty Damice-Thomasa a presenta su buki “Pa semper den mi kurason,” un buki dedica na muchanan di entre 7 pa 12 aña cu a pasa e dificil momento di perde un ser keri.

Damice-Thomasa a studia na Universidad di Leiden, awor e ta duna terapia na mucha cu problema emocional, comportacion desviante y ademas ta haci test psicologico. Den su tempo liber e ta comparti temanan educativo via diferente medionan di comunicacion.

Segun el a comenta, ‘Pa semper den mi kurason’ ta skirbi pa muchanan di 7 te cu 12 aña cu ta pasando den e proceso di luto despues cu un di nan ser keri a fayece. Mucha no sa con pa deal cu e proceso di luto aki na e manera corecto. Consecuentemente nan por bira agresivo, perde interes den varios actividad y nan prestacion na scol ta bay atras. Tin biaha mayornan tambe ta den nan dolor y no sa con pa yuda nan mes, te pa yuda nan yiunan. Netamente pa e motibo aki Damice-Thomasa a skirbi su buki.

Meta di e buki ta pa muchanan reconoce cu no ta nan so den nan luto. Esaki por alivia e proceso di luto. E ta tambe pa mucha y mayor por haya guia den e proceso di luto. El a enfatisa tambe pa e buki ta na Papiamento, debi cu e topico ta uno delicado y ta importante pa e ta den e mucha su idioma materno.

Damice-Thomasa a defini su mes como un persona cu ta creativo, tin humor, simpatico, gusta yuda su prohimo, gusta pasa tempo cu famia y mucha, gusta naturalesa y gusta siña.

El a declara cu el a scoge e profesion di psicologo pa motibo cu “mi kier pa un hende alcansa su maximo potencial a pesar di tur loke el a pasa aden”. Como psicologo e kier yuda pa medio di terapia unda e hende ta siña:

– Maneha su emocionnan.

– Corigi pensamentonan destructivo y transforma nan den pensamentonan constructivo.

– Descubri ken e ta como persona.

– Aprecia y balora su mes pa ken e ta, pa asina e por alcansa su maximo potencial.

“Pa semper den mi kurason”, ta trata e proceso di luto cu Djuni ta experencia despues cu su wela a fayece. Tambe e buki ta duna guia con pa yuda un mucha den e proceso di luto y esey ta motibo principal dicon el a skirbi e buki aki.

Damice-Thomasa a conta cu e parti mas dificil di su trabao ta “ora cu bo ta mira ki potencial un hende tin y kico por yud’e alcansa su maximo potencial. Pero bo no por hiba un hende caminda e mes no kier bay.”

 

Debi cu e buki ta dirigi pa mucha, a puntra na Damice-Thomasa si e ta kere cu ta existi un necesidad pa crea y skirbi mas buki di e tipo aki pa yuda nan den procesonan asina dificil di bida, caminda el a contesta: “Sigur cu si tin un necesidad den e area aki. Netamente esaki ta un di e motibonan cu esaki a bira mi pasion. Pa medio di literatura, duna terapia na hendenan di diferente edad cu problemanan social y psicologico.”

Pa finalisa, el a laga un mensahe pa lectornan: “Si bo kier haci algo y bo sa cu e ta di balor agrega pa abo y otro, pero bo tin miedo, haci’e toch.”

 

Damice-Thomasa a bishita e otro islanan den reino como Boneiro y tambe Aruba e prome dianan di e luna di juli, unda el a duna di conoce su buki na Biblioteca Nacional Aruba lagando cinco ehemplar eynan. Ademas el a laga otro bukinan mas na otro instancianan, como por ehemplo SVGA y SKOA. Su bukinan tambe ta disponibel na e tiendanan di buki di Aruba.