(AFP)—Robert Duvall, ken a interpreta e abogado di e mafia Italiano-Mericano den “The Godfather” y a captura atencion cu su representacion di un coronel obsesiona cu surfing den “Apocalypse Now,” a muri na edad di 95 aña, su esposa a confirma dialuna.
Su fayecimento diadomingo a ser confirma pa su esposa, Luciana Duvall.
“Ayera nos a bisa ayo na mi esposo stima, amigo aprecia y un di e actornan mas grandi di nos tempo. Bob a fayece trankil na cas,” el a skirbi.
Conoci pa su manera directo di papia, prolifero y poco interesa den glamour, Duvall a gana un Oscar como mihor actor y a ser nomina seis otro biaha. Durante su carera di mas cu seis decada, el a briya tanto den rolnan principal como secundario, y eventualmente a bira director. El a sigui actua te den su 90 añanan.
“Pa mundo, e tabata un actor ganador di Academy Award, un director, un contador di storia. Pa mi, e tabata simplemente tur cos,” Luciana Duvall a bisa. “Su pasion pa su arte tabata solamente iguala pa su amor profundo pa personahenan, un bon cuminda y combersacionnan largo cu hende.”
Duvall a gana su Academy Award na 1983 pa interpreta un cantante di country cu un carera cu a cay atras den “Tender Mercies.”
Pero su personahenan mas memorable tambe ta inclui e consehero fiel di mafia, Tom Hagen, den e prome dos pelicula di “The Godfather”, y e teniente coronel casi maniatico William Kilgore den Francis Ford Coppola su pelicula clasico di guera di Vietnam na 1979, “Apocalypse Now.”
“Tabata un honor pa traha cu Robert Duvall,” ganador di Oscar Al Pacino, ken a actua hunto cu Duvall den “The Godfather”, a bisa den un declaracion.
“El a nace un actor manera nan ta bisa, su conexion cu e arte, su comprension y su don fenomenal lo ser recorda pa semper. Mi lo sinti su falta.”
Como Coronel Kilgore, Duvall a haya un nominacion pa Oscar y a bira un strea berdadero despues di añas interpretando rolnan mas chikito, den un actuacion unda e ta pronuncia un di e linea mas famoso den historia di cine.
“Mi ta stima e holor di napalm mainta,” su personahe amante di guera—sin camisa y cu un sombrero di cowboy—ta reflexiona mientras avionnan di guera Mericano ta bombardia un rij di palo na e beach unda e kier bay surfing.
E personahe originalmente tabata crea pa ta aun mas exagera—su nomber prome tabata Coronel Carnage—pero Duvall a baha e exageracion un poco, demostrando su acercamento cuidadoso na actuacion.
“Mi a haci mi huiswerk,” Duvall a bisa na 2015 den un entrevista cu presentador Larry King. “Mi a haci mi investigacion.”
Gigante di cine Francis Ford Coppola—ken a dirigi Duvall den “Apocalypse Now” y “The Godfather”—a yama su perdida “un golpi.”
“Un actor asina grandi y un parti asina esencial di American Zoetrope desde su cuminsamento,” Coppola a bisa den un mensahe riba Instagram.
Duvall a haya fama laat den Hollywood—e tabatin 31 aña caba ora el a entrega su actuacion decisivo como e recluso misterioso Boo Radley den e adaptacion cinematografico na 1962 di e novela di Harper Lee, “To Kill a Mockingbird.”
Despues el a interpreta un cantidad di rol—un ehecutivo agresivo den “Network” (1976), un oficial di Marines cu ta trata su famia manera soldadnan den “The Great Santini” (1979), y despues su rol estelar den “Tender Mercies.”
Sinembargo, Duvall frecuentemente a bisa cu su rol faborito tabata un cu el a interpreta den un mini-serie di television na 1989—e Texas Ranger cowboy Augustus McCrae den “Lonesome Dove,” basa riba e novela di Larry McMurtry.
Actriz Britanico Jane Seymour, ken a traha cu Duvall den e pelicula “The Stars Fell on Henrietta” na 1995, a comparti un homenahe sincero riba Instagram. “Nos por a comparti su amor pa barbecue y incluso un poco tango,” Seymour a skirbi publica cu un foto di nan dos. “E momentonan pafo di trabao tabata mesun memorable cu e trabao mes.”
Actor Mericano Alec Baldwin a publica un video corto como homenahe na Duvall, papiando tocante su “carera robusto.” “Ora el a haci ‘To Kill A Mockingbird’ e simplemente a destrui bo cu su actuacion di Boo Radley, e no a usa ni un palabra di dialogo, ni un palabra, y e simplemente ta conmociona bo,” Baldwin a bisa.
Critico di cine Elaine Mancini algun biaha a describi Duvall como “e actor mas tecnicamente competente, mas versatil y mas convincente riba pantaya na Merca.”
