Pa ayera 2or atardi, e cantidad di pashent positivo compara cu e dia anterior a aumenta cu un (1) caso di coronavirus/Covid-19. Mientras cu e cantidad di hende cu a wordo getest di diahuebs pa diabierna tabata 61.
Ayera tardi PR di DVG, Jurette Croes a duna un actualisacion di e casonan di Covid-19, caminda tabatin 96 caso positivo di cual 43 persona a recupera. Esaki kiermen cu nos tin 4 persona mas cu a recupera di e virus aki. Actualmente tin 51 caso positivo y activo di Covid-19. Negativo tin 1202, mientras cu e cantidad di test haci te cu ayera tardi tabata 1298.
Te ayera tardi tabatin 106 persona den cuarentena, kiermen 16 persona extra den cuarentena compara cu diahuebs cu tabatin 90. E persona cu a fayece y cu nan tabata positivo pa Covid-19 ta dos (2). Tambe el a laga sa cu tin tres (3) persona interna den hospital pa motibo di e virus aki.
Riba pregunta di Bon Dia Aruba, Jurette Croes a referi tocante e casonan di Paradijswijk y esun di e beauty salon, caminda DVG a haci un yamado pa e personanan cu tabatin contacto cu esunnan cu tabata positivo, por yama na Call Center na telefon 280-0101.
El a bisa cu tin personanan cu ta yama pa notifica cu nan tabatin contacto cu e persona cu a fayece na Paradijswijk; of ya sea cu e persona di e beauty salon, caminda e personanan aki ta wordo getest debidamente pa descarta si nan tin e virus si of no.
Encuanto si e aumento di e hendenan den cuarentena tin di haci cu e dos casonan aki, Croes a bisa cu hopi biaha e cifra di personanan den cuarentena ta varia practicamente tur dia.
El a splica cu recientemente tabatin un par di personanan cu a bin di biahe y nan mester a bay den cuarentena segun nan protocol. Pero igualmente tin persona cu ta sali for di cuarentena y tambe personanan cu a recupera rond di nan cu tambe ta sali for di cuarentena. Pues el a conclui cu e cifra di persona den cuarentena tur dia tin cambio riba dje.
