Desaroyonan di conflicto na paisnan bisiña, principalmente na Venezuela, ta presenta risiconan pa Aruba y pa maximalisa esfuersonan pa reduci e risiconan, Cuerpo Policial y Kustwacht ta trahando cada dia mas di cerca cu otro. Minister di Husticia, mr. Drs. Arthur Dowers a splica cu ta haciendo uzo maximo di e recursonan di Kustwacht manera varios boto, diferente radar, avion y helicopter pa combati crimen maritimo.
Cuerpo Policial, particularmente Polis Maritimo, ta trahando den cooperacion estrecho cu Kustwacht y entretanto a amplia e trabao di Polis Maritimo tambe, pa hunto autoridadnan por provee un miho proteccion y integridad di e pais. E cooperacion entre Polis Maritimo y Kustwarcht ta hopi bon y ta dunando bon resultado, Minister Dowers a bisa.
E mandatario a splica cu actualmente tur dia ta deporta 6 pa 7 ilegal; mayoria di Venezuela. E cantidad di persona cu ta drenta Aruba via di e costanan ta minimo, e mayoria ta personanan cu ta yega Aruba legalmente como turista cu avion, pa despues nan keda tin permiso. Ora autoridadnan haya nan ta traha nan por wordo deteni y e proceso ta cuminsa pa nan deportacion. Tambe ilegalnan cu ta keda deteni ora nan comete un acto criminal.
Minister Dowers a bisa cu e desaroyonan regional, particularmente na Venezuela, ta pone presion grandi riba e paisnan y e recursonan disponibel y mucho mas hende ta purba di sali di nan pais pa biba otro caminda. Como cu tur persona cu wordo deteni trahando ilegal mester presenta dilanti Hues Comisario pa cuminsa e proceso di deportacion, tin limitacion pa autoridadnan por actua hopi lihe y continuamente pa cu deportacion.
Minister Dowers a bisa cu e contesta pa e discusion di e pakico Aruba no tin radar mas ta uno cu mester wordo busca cerca e ex Minister di Husticia, kende tabata na mando den tempo di MEP. E Minister ey ta esun cu tabatin hendenan cu no por confia y iresponsabel cual no a pasa e screening adecua ta traha cu e radarnan, cu a resulta den un acuerdo cu e ex Minister mester a firma cu Hulanda, primintiendo cu e lo kita dos di e tres radarnan cu el a instala.
E Minister di husticia a splica cu den tempo di gobernacion di MEP a cumpra tres radar, di cual dos a wordo instala y tur a daña. Tin tur e documentacion pa prueba cu ta e Minister e tempo ey a yega na un acuerdo y a firma e documento primintiendo Hulanda cu lo kita e radarnan. Minster Dowers a bisa cu e conflicto tabata sinta entre otro cu algun di e trahadonan tabata yudando en bes di combati transportacion di droga uzando e facilidadnan di radar.
Tabata un inversion cu no a saca bon uzo di dje. Aruba de facto no a keda sin radar, como cu e supervision di e area necesario a wordo tuma over pa e radarnan di Kustwacht, Minister Dowers ta agrega. Entretanto a duna tambe Kustwacht mas autorisacion pa actua riba tera tambe contra esunnan cu ta drenta y keda Aruba ilegal. Minister Dowers a remarca cu lo cuminsa instala camaranan special na frontera pa contribui na e siguridad di nos isla.
Autoridadnan no ta mantene e ilusion cu ningun hende lo purba di landa drenta Aruba, pasobra cu e situacion cu e hendenan ta aden y tin hendenan na Aruba mes cu ta atrae nan pa bin aki, ta haci cu nan lo sigui purba.
Minister Dowers a bisa cu den transcurso di e simannan cu ta bin lo tin e discusion tambe pa cuminsa persigui legalmente e personanan cu ta contribui na sconde e ilegalnan y/of provee nan cu un caminda y e oportunidad pa keda aki ilegalmente. Esaki lo encera aplicacion di leynan vigente encuanto di “mensenhandel”, entre otro. Te awo solamente a trata casonan di mensensmokkel na Aruba, el a agrega.
Basicamente, si un persona ta yuda un persona yega y/of keda Aruba ilegalmente e persona ey tambe mester ricibi un castigo of boet y entre Ministerio Publico, Minister di Husticia y servicio di siguridad nacional ta papiando con pa aumenta e boetnan.
Minister Dowers ta conclui bisando cu haciendo esfuersonan combina ta trahando for di diferente angulo riba e problematica aki y pa preveni y evita retonan y situacionnan no desea. E mandatario a comenta cu tin hopi planning, pero no suficiente placa pa realisa cierto proyectonan y cu lo ta trahando riba ricibi e recursonan necesario pa medio di entre otro cobra boetnan mas halto pa infraccionnan cu tin di haci cu estadia ilegal na Aruba. Fuente:comunicado Minjus
