Un prome grupo di 19 persona of grupo familiar a firma un acuerdo di traspaso di tereno di huur y otorgamento di tereno nobo y fertil den areanan manera entro otro Catashi y Savaneta. E prome persona cu a firma e acuerdo tabata Sra. Irena Geerman.
Prome Minister, Evelyn Wever-Croes ta esun cu a habri e acto aki di otorgamento di tereno di huur cu a tuma luga den un ambiente natural na Ser’i Noka. El a bisa cu ayera tabata un dia hopi special. E acto aki a conta cu presencia di director y representante di diferente departamento, entre nan DOW, DIP, Kadaster, Santa Rosa, Departamento di Medio Ambiente y Naturaleza y Departamento di Asunto Economico. Pero tambe WEB y Utilities cu a percura un rebaho di un 42% riba prijs di awa den forma structura y duradero pa e cunukeronan.
Premier Wever-Croes a cualifica e hecho aki como ‘algo grandi,’ caminda hende a wordo poni central. E ta haya cu e acto aki ta mustra cu nan ta cumpliendo cu e programa di gobernacion riba nan compromiso pa stimula agricultura y percura cu e sector aki lo por bira un pilar economico.
P’esey pa desaroya e sector aki nan a logra un rebaho substancial riba prijs di awa cu sosten di WEB N.V y Utilities. El a laga sa cu esaki ta e inicio so, ya cu Santa Rosa lo duna tur sosten na esunnan dedica na agricultura. Tambe e tabatin palabra di elogio cu minister Lopez-Tromp kende a percura pa termina e proceso aki di otorgamento di e terenonan aki dedica pa agricultura, ya cu esaki lo por nifica un capitulo nobo pa e famianan dedica na e actividad aki.
Minister Chris Romero kier a bisa cu e actividad aki no solamente ta busca crea un pilar economico, sino garantisa siguridad alimenticio. El a remarca cu esfuerso grandi a wordo haci pa soluciona e problema di awa. Te hasta un MoU a wordo firma entre Santa Rosa y WEB pa facilita e forma pa distribui awa pero na prijs reduci. Manera finalmente a yegada sosode cu un presentacion di WEB na Conseho di Minister ayera. E prijs reduci na 5.50 florin pa kub ta brinda diferente posibilidad y awa di calidad locual -segun e mandatario Romero- ta wordo traduci den producto di calidad y certifica pa e sector hotelero por ta interesa den dje. El a remarca cu e awa mester uza di forma consciente. Tambe e cunukero lo haya educacion organisa pa Santa Rosa pa nan actividad por bira un exito.
Minister Lopez-Tromp a bisa cu no solamente di otorgamento di tereno huur a bira un prioridad, pero e facilidad di awa tambe, pero awor e prijs a keda reduci. Pero tambe nan a logra acelera proyecto di agricultura durante e crisis di Covid, riba e proposito di Aruba por abastece di producto agricola su mes. E mandatario a laga sa cu e acto aki tin di haci cu traspaso di tereno di un generacion pa otro di e mesun famia, pero tambe tereno di huur otorga pa prome biaha. Nan tin pensa di bin cu un tipo di Agri Bank of Fonds pa e agricultor por tin acceso pa fondo destina pa haci inversion den e sector aki.
Nan ta e prome grupo pa traspaso di tereno di huur, pero nan tin plania otro grupo, ya cu e lo bira un continuidad cu envolvimento di diferente departamento, pa e sector di agricultura por bira mas grandi ainda.
