(NLTimes)—Hopi adolescente Hulandes ta asina adicto na nicotina via vaping cu e ta pone nan lanta anochi, segun un estudio nobo conduci pa dokternan Hulandes. Nan a puntra adolescentenan na cinco scol secundario si nan ta vape y con frecuente. Un tercer di esnan cu a indica cu nan a vape of a huma den e ultimo aña a bisa cu nan ta lanta anochi pa huma un poco, RTL Nieuws ta reporta.
E dokternan a encuesta 978 adolescente for di cinco scol secundario den e pais. 369 a indica cu nan a huma of a vape den e ultimo aña, 183 di nan a haci esaki diariamente. 133 adolescente a bisa cu nan ta vape anochi.
Lillian Goossen, e dokter principal na WeQuit, un practica di cuido enfoca riba yuda hende stop di vape, a bisa cu ta “hopi preocupante” cu adolescentenan ta hayando antohonan asina fuerte cu nan ta lanta anochi. “Den pasado nos a mira esaki solamente den humadornan frecuente, pero no den muchanan,” el a conta e emisora.
“Esey ta parcialmente pasobra vaping ta asina facil. No tin barera mas,” Goossen a bisa. “Nan ta pone vape den alcance, por ehempel, bao di nan cusinchi. Si despues nan huma un tiki anochi, e antoho ta bay, y nan por bay drumi back.”
Fuera di e hecho cu vaping ta malo pa bo salud, adiccion ta bin cu su mesun set di retonan diario, Goossen a bisa. Adictonan no por concentra mucho, ta sinti frustra y tin menos control emocional, ademas di tin mas chance di desaroya depresion y ansiedad.
