(AP) — Administracion di presidente Donald Trump a adverti ayera cu no ta bay garantisa pago atrasa pa trahadornan federal durante un shutdown di gobierno, revertiendo loke ta un politica di hopi tempo pa alrededor di 750mil trahador suspendi, segun un memo cu Cas Blanco ta circulando.
Trump a firma den ley despues di e shutdown mas largo di gobierno na 2019, legislacion pa sigura cu trahadornan federal ricibi e pago atrasa durante cualkier pausa den financiamento. Pero den e memo nobo, su Oficina di Management y Presupuesto ta bisa cu e pago atrasa mester ser duna pa Congreso, si scoge pa haci esaki, como parti di un ley pa financia gobierno.
“Tin algun hende cu no merece pa ser cuida, y nos ta bay cuida nan di un manera diferente,” Trump a bisa durante un evento na Cas Blanco.
El a bisa cu pago atrasa “ta depende tocante ken nos ta papia.” Contestando un di dos biaha tocante pago atrasa pa trahadornan federal suspendi, mirando cu e rekisito ta poni den ley, Trump a bisa: “Mi ta sigui ley, y loke ley ta bisa ta corecto.
Rechasa pago retroactivo pa e trahadornan, algun di ken mester keda na trabao como trahador esencial, lo ta un separacion skerpi di norma y practica y casi sigur lo genera accion legal.
Mientras trahadornan federal – como tambe miembronan den servicio di ehercito – hopi biaha a keda sin pago durante shutdown den pasado, casi semper a paga nan back unabes cu gobierno habri back.
“Esey lo mester aumenta e urgencia y necesidad di e Democratanan pa haci lo corecto akinan,” presidente di Congreso, Mike Johnson a bisa na un conferencia di prensa na e Capitol.
Johnson, un abogado, a bisa cu e no a lesa e memo completamente, pero “tin algun analista legal cu ta bisando” cu no lo ta necesario ni apropia pa paga e trahadornan federal back.
Pero Senador Democrata, Patty Murray di Washington a critica administracion di Trump pa desafia ley. “Otro intento sin base pa purba spanta y intimida trahadornan, di un administracion dirigi pa criminal y cobarde,” segun Murray.
Den e memo prepara pa director di Oficina di Management y Presupuesto di Trump, Russ Vought, reporta prome pa Axios, consehero general di e oficina, Mark R. Paoletta ta presenta un motivacion legal pa no paga e trahadornan federal e salario atrasa.
E memo ta splica cu mientras e Ley di Trato Husto di Empleado di 2019 ta bisa cu lo paga back e trahadornan unabes cu financiamento federal ta restaura, e ta argumenta cu e accion no ta ehecuta su mes. Na su lugar, e memo ta bisa, paga back e trahadornan federal lo mester ta parti di legislacion subsecuente, por asumi den e ley pa habri gobierno back.
E analisis ta basa su mes riba lenguahe familiar pa expertonan den presupuesto door di sugeri cu e ley di 2018 a crea un autorisacion pa paga e trahadornan federal back, pero no e apropiacion real. Congreso, e ta bisa, por dicidi si kier paga e trahadornan back of no.
Pa awo, Congreso ta den un impasse, cu ningun banda – ni Cas Blanco – mustrando disponibilidad pa baha cabes. Democratanan ta bringando pa fondo pa preveni un pausa den subsidio federal pa cuido di salud. Republicanonan ta bisa cu por atende e asunto aki despues.
