(AFP) – Administracion di presidente Mericano, Donald Trump a busca diaranson un manera pa controla aumento di costo di energia ocasiona pa e guera den Medio Oriente, temporalmente eliminando un ley di cargamento un siglo bieu, y eliminando sancion riba Venezuela.
E movidanan a yega despeus cu prijs di petroleo a aumenta despues di atakenan di Merca y Israel contra Iran dia 28 di februari. E represalia di Teheran a trece cargamentonan pasando door di Estrecho di Hormuz na un paro virtual, horcando cadenanan di suministro di energia.
Alrededor di un di cinco parti di crude oil y gas natural likido (LNG) global ta pasa door di e via acuatico critico den temponan di paz, y crudo Brent North Sea a avansa tiki mas di cinco porciento anteriormente diaranson.
Prijs averahe di gasolin na Merca a aumenta cu mas di 27 porciento desde comienso di e guera, segun datonan di AAA motor club.
Esaki ta pone mas presion ainda riba presupuesto di hogarnan Mericano – cu consumidornan ya enfrentando costo halto di bida – aumentando presion riba administracion di Trump cu eleccionnan clave di midterm cerca.
Pa awo, e anuncio di Trump di un exencion di 60 dia di Jones Act lo elimina un prohibicion riba barconan cu bandera stranhero transportando carga entre puertonan Mericano durante e periodo aki.
E ley di 1920 tabatin meta pa promove construccion di barco Mericano, pero criticonan ta argumenta cu e ta limita comercio liber y a aumenta costo pa consumidor.
E movida ta “djis otro stap pa mitiga e interupcionnan a corto plaso den mercado di petroleo mientras ehercito Mericano ta sigui cumpli obhetivo di Operacion ‘Epic Fury,’” segun Secretario di Prensa di Cas Blanco Karoline Leavitt a bisa den un declaracion, referiendo na e campaña contra Iran.
“E accion aki ta bay permiti recursonan vital manera petroleo, gas natural, fertilisante y carbon pa move libremente na wafnan Mericano pa 60 dia,” el a agrega.
El a priminti cu administracion di Trump “ta keda comprometi na continua reforsando nos cadenanan di suministro critico.”
Separadamente, Departamento di Tesoro a duna un licencia diaranson pa autorisa cierto transaccion entre entidadnan estableci na Merca y compania di petroleo estatal Venezolano, Pdvsa.
“E licencia aki ta bay beneficia ambos Merca y Venezuela, mientras ta sostene e mercado di energia global door di aumenta e suministro di petroleo disponible,” un vocero di Tesoro a bisa.
Vice-presidente Mericano, JD Vance a papia di e asunto diaranson durante un bishita na un facilidad di manufactura na Michigan: “Nos tin un caminda dificil nos dilanti pa proximo simannan, pero e ta temporal.”
‘Aliviando bottleneck’
Jones Act ta rekeri pa cargo transporta riba awa entre wafnan Mericano ser movi riba barconan cu ta construi na Merca, propiedad di Merca y registra bao bandera Mericano.
Apenas un fraccion di e tankernan di mundo ta cumpli cu e ley, segun Colin Grabow, un director asocia na e libertario Cato Institute. “Pues e ta un expansion dramatico den e cantidad di barco cu ta bay por usa” den transporta producto dentro di e economia mas grandi na mundo, el a bisa AFP, referiendo na e exension temporal di Trump.
El a bisa cu ta casi cinco biahe mas caro pa construi un tanker di rango medio na Merca cu na Asia, loke por splica pakico no tin hopi barconan asina na nivel global.
Grabow ta kere cu e medida ta bay reforsa cadenanan di suministro Mericano, pero a adverti cu e efecto riba prijs por ta limita si e guera continua.
“E por yuda mitiga algun di e interupcionnan,” el a bisa. Pero bayendo dilanti, e situacion mester ta menos tocante reduccion di costo cu “baha e tasa di e aumento.”
Josh Lipsky di Atlantic Council a bisa AFP cu e exension di e ley di guera “probablemente no ta bay tin impacto significante riba mercadonan di energia y prijs di gasolin global.”
“E ta un movida demasiado chikito pa afecta e forsanan mas grandi cu ta actuando den Golfo,” el a adverti.
“E decision di 60 dia en bes di e 30 cu nos a spera por señala un conflicto mas largo, sinembargo,” Lipsky a agrega.
Analistanan di S&P Global ta calcula cu cargamentonan cu ta cumpli Jones Act por costa biyones di dollar mas cu usa un barco stranhero.
