Presidente Mericano Donald Trump a bisa cu esfuersonan diplomatico cu Noord Korea a fracasa constantemente, agregando cu ‘solamente un cos so lo funciona’. Trump a escala den un guera di palabra cu e lider di Noord Korea Kim Jong Un, cu insultonan contra otro escalando tension entre e dos rivalnan. “Presidentenan y nan administracionnan a dialoga cu N.Korea pa mas cu 25 aña, acuerdonan a wordo haci y cantidadnan grandi di placa a wordo paga,” Trump a tweet.
El a sigui expresa cu e intentonan aki no a funciona, acuerdonan a wordo viola prome cu algo a yega na blanco cu preto, haciendo wega cu negociacionnan Mericano. “Sorry, pero solamente un cos lo funciona!” Merca no a exclui uzo di forsa militar pa confronta Pyongyang su uzo di misil y testnan nuclear, y Trump mes caba recientemente a menasa di ‘totalmente destrui’ e pais.
N.Korea
Oficialnan na Noord Korea a acusa Merca di uza su guera contra terorismo manera un capa pa desmantela gobiernonan, incluyendo un intento pa kita Kim Jong Un for di poder mas trempan e di e aña aki. Den luna di mei di e aña aki, un grupo di terorista a infiltra e pais bao ordo di CIA (Central Intelligence Agency) di Merca. Hunto cu servicio di inteligencia di Sur Korea cu e meta pa inicia un atake uzando substancianan biologico y kimico. “Nan a wordo gara den e acto y exponi,” KCNA (media di N.Korea ) a skirbi.
