AZV ta cubri tur gasto medico, sea cu e lesion ta severo of no, con tal cu esaki a sosode na Aruba, cu e cuido ta indica medicamente y cu e cuido ta ‘comun y coriente’ dentro di e profesion medico. Si acaso e tratamento necesario no por wordo duna na Aruba, AZV lo percura pa manda e pashent afo pa haya e tratamento medico necesario. 

Loke sa sosode
Den un intento pa yuda e pashent, familiarnan sa dicidi pa hiba e pashent exterior pa busca tratamento medico.

Esaki ta totalmente comprendibel como ser humano. Bo kier bo ser keri recupera su salud mas lihe cu ta posibel. Pa e bira e ‘bieu’ bek. Sin embargo, loke hopi biaha e pashent y of su famia no ta tene cuenta cune ta cu e acto aki –di transporta bo ser keri riba propio responsabilidad pa exterior- por resulta den gastonan medico halto cu na comienso no ta un peso pa e famia pero despues si por bira un peso. Loke AZV ta wak ta cu e pashent of su famia ta acerca AZV e ora pa haya ayudo y ta wordo confronta cu e situacion fastioso caminda AZV no por asumi e gastonan.

Aprobacion adelanta
Lastimamente unabes un pashent of famia opta pa bay exterior riba nan mes, AZV no por yuda.

E ley di AZV ta stipula cu mester tin un aprobacion adelanta di AZV. Tambe mester cumpli cu otro exigencianan den e ley di AZV p.e. mester determina cu e cuido no por wordo duna na Aruba. E motibo principal pakico AZV ta trece e informacion aki ta pa conscientisa su aseguradonan y comunidad en general cu gastonan medico por bira hopi. Esey ta nifica cu e momento cu tuma e decision pa busca tratamento medico den exterior riba bo mes responsabilidad, financieramente e pashent of famia mester ta hopi bon prepara. Na varios ocasion por a scucha di casonan cu e pashent a bay riba su mes exterior of ta haci fundraising pa bay den exterior pero despues ta ripara cu no tin e forma financiero mas pa paga e cuenta y ta acudi na AZV pa pidi ayudo.

Posicion
AZV ta opina cu tin un bon sistema di cuido medico na Aruba. Semper por tin aki aya puntonan di mehoracion pero den principio por haya e tratamento medico necesario na Aruba mes.

Si a caso e tratamento necesario cu un pashent mester no por wordo duna na Aruba, AZV mes lo percura pa manda e pashent afo pa haya e tratamento medico necesario. Pero pa e personanan cu di un manera of otro no ta kere cu e cuido cu bo mes of bo miembro di famia ta hayando ta esun corecto, papia cu bo dunado di cuido of acudi na AZV prome cu bo dicidi di busca cuido den exterior riba bo mes. Si a caso bo dicidi di bay afo pa cuido medico, evalua bo caso bon prome cu bo bay den exterior riba bo mes.

AZV kier alerta tur hende cu ora bo a ricibi un plan di tratamento di e clinica di exterior, tene cuenta cu esey kisas no ta e factura final pa motibo cu tur cos ta depende di con e tratamento ta bay. Si e pashent haya complicacion, esaki por cambia e plachi completo y resulta den gastonan medico adicional y tambe por ehempel pa estadia cu no a wordo premira y calcula anteriormente.

 

LEAVE A REPLY

Please enter your comment!
Please enter your name here