Durante weekend, Aruba Airport Authority NV a duna un aclaracion relaciona cu varios ‘post’ riba rednan social referente un fila di hende na aeropuerto riba diasabra 28 di juni 2025.
Den un comunicado di prensa, Aruba Airport Authority N.V. a informa cu e sistema di maneho di maleta pa vuelo pa Merca a experiencia un congestion temporal debi cu algun maleta no a wordo procesa corectamente durante e proceso di check-in. Esaki a causa un pausa temporario den e proceso di check-in, cu eventualmente a resulta den un fila di pasahero pafo di terminal.
E situacion a wordo resolvi rapidamente y ningun vuelo a experiencia un retraso pa motibo di esaki, segun e AAA.
“Mientras nos ta sigui optimalisa e sistema nobo di maneho di maleta y e operacion den e terminal nobo di check-in, e personal ta sigui haci cierto ahustenan pa mehora e operacion”, e comunicado ta continua. “Nos ta evaluando e incidente aki pa implementa medidanan preventivo pa evita cu esaki sucede atrobe.”
Finalmente, AAA a bisa di ta contento pa bisa cu danki na e terminal nobo pa e vuelonan Mericano, e sistemanan nobo y e control di fluho di pasahero recientemente introduci, e operacion a mehora bastante – cu un proceso mas eficiente y sin necesidad di recoge maleta of control di seguridad secundario.
“Danki na tur pasahero pa nan pasenshi y comprension.”
