Wowo di mundo ta riba candela na Amazon, pero imagen di satelite ta mustra un cantidad mas grandi di candela na e continente Africano. NASA a yama Africa e continente di candela, cu 70% di e 10.000 candela cu ta kima rond mundo.
E agencia ta bisa cu e cantidad ta constante di aña pa aña. Mientras Presidente di Francia, Emmanuel Macron, a bisa cu ta considerando un campaña internacional pa yuda paisnan Africano combati candela, segun experto e situacion ta diferente, ya cu ainda no ta un problema grandi, aunke por bira un menasa grandi den futuro.
Angola tabatin mas candela cu Brasil siman pasa. NASA a indica 6.000 candela na Angola, 3.000 candela na Congo y poco mas di 2.000 na Brasil.
Sally Archibald, profesor di Wits University na Johannesburg, a bisa cu tin pregunta riba e maneho di candela na ecosistema di Africa, pero candela ta parti di nan ecologia. Archibald ta studia maneho di candela y dinamica di Sabana.
Candela na sabana ta libera carbon dioxide, pero pa un aña e yerba ta bolbe crece y ta absorbe gran parti di e carbon di atmosfera. E candela por pusha, pero mayoria di biaha e ta paga na e frontera.
“E mensahe principal ta, si no tin hopi candela, no ta malo y por ta bon pa ecologia, pero nos no sa cuanto candela di deforestacion nos tin. E miho evidencia ta cu nos boskenan no ta disminui pero ta aumenta”, Archibald a bisa.
