(AFP)—Agencia di Salud Publico di Suecia a bisa diahuebs cu e ta recomenda pa mayornan no duna muchanan nan propio smartphone prome cu 13 aña di edad, citando varios riesgo relaciona cu uso di esakinan.
Agencia di Salud Publico di Suecia a bisa den un comunicado cu e meta di e recomendacion nobo ta “principalmente pa reduci e riesgo cu muchanan ser exponi na contenido dañino, desaroya problemanan di drumimento of desaroya un patronchi di uso similar na adiccion”.
E agencia a bisa cu, aunke entrevista cu muchanan a mustra cu nan ta aprecia e posibilidad di keda den contacto cu famia y amigonan via telefon, e riesgonan potencial ta supera e beneficionan.
“Uso ta relaciona cu distraccion, presion social y exposicion na contenido dañino y contactonan dañino,” e agencia a bisa, mientras cu e tambe a nota cu investigacionnan ta mustra cu e ta relaciona cu “drumimento di calidad mas abao”.
Si mayornan kier pa nan yiunan tin un telefon, e agencia a recomenda pa miho duna nan un “telefon simple” sin acceso na internet.
“Nos speransa ta cu e recomendacion lo sirbi como apoyo den bida diario,” Olivia Wigzell, director di e agencia, a bisa, notando cu e ta similar na recomendacionnan di bisiñanan Nordico di Suecia, Dinamarca y Finlandia.
E agencia di salud a ricibi e tarea di investiga uso di pantaya y nan impacto riba muchanan.
Na juni, el a haci un yamado na mayornan pa no usa nan telefon ora cu nan ta pasando tempo cu nan yiunan.
Na januari, gobierno di Suecia a bisa cu e lo prohibi smartphone na scolnan pa muchanan te cu grado nuebe, den otro palabra, pa muchanan te cu aproximadamente 15 of 16 aña di edad.
