(AP) – E departamento di tesoreria ta enfrentando critica di e industria di criptomoneda tocante sancionnan imponi riba un agencia cu ta acusa di yuda laba biyones di dollar, cu algun fondo bayendo pa hackernan di Noord Korea.
Anteriormente e luna aki, e departamento di tesoreria a impone sancionnan riba e agencia Tornado Cash, cual aparentemente a yuda laba mas di 7 biyon den criptomoneda desde su creacion den aña 2019.
E servicionan aki ta combina varios bienes digital, incluyendo esunnan potencialmente ilegal y fondonan obteni legalmente, pa mantene su origen un secreto, incluyendo placa cu a ser horta.
Den e simannan despues cu e sancionnan a ser anuncia, agencianan di criptomoneda y por lo menos un autoridad a bini na defensa di e agencia, bisando cu e sancionnan ta habri porta pa limita e Mericanonan su uso di programacion di privacidad.
Coin Center, un agencia cu ta boga pa criptomoneda a bisa cu e tesoreria a “sobrepasa nan autoridad legal” via nan sancionnan, cual “potencialmente ta den violacion di derechonan constitucional.”
Un agencia di criptomoneda, Tether, a bisa cu nan no lo congela nan cuentanan conecta cu Tornado Cash y tin intencion di mantene esaki habri. Rep. Tom Emmer (R-Minn.) a dirigi su mes na Treasury Secretary Janet Yellen e siman aki pidiendo pa ta mas racional cu e sancionnan, pa motibo cu esaki “no solamente ta impacta nos siguridad nacional, sino tambe e derecho di privacidad cu tur ciudadano Mericano tin.”
