Recientemente a keda publica e agenda y rapport di ehecucion (Uitvoeringsrapportage) pa e periodo di april te september 2025, tocante e implementacion di reforma cu Aruba a acorda cu Hulanda den cuadro di e landspakket. Den esaki a dedica atencion na e Mercado Laboral y Seguridad Social.

Mercado laboral ta keda un pilar di desaroyo socioeconomico di Aruba, y capitulo 9 di e agenda di implementacion ta enfoca riba dos prioridad urgente cu ta mara na otro: mehora funcionamento di mercado laboral, y reforsa e sostenibilidad di sistema di seguridad social. Mientras Aruba ta continua nabega cambionan economico structural despues di pandemia, ta invertiendo den mehoracion institucional, modernisacion di data, realineacion di politica, y mecanismonan mas fuerte pa match mercado laboral. Asina mes, e caminda nos dilanti no ta sin obstaculo – desde limite den capacidad di ehecucion y atraso legislativo, te coordinacion inter-institucional debil.

E strategia di reforma di labor na Aruba ta informa pa un vision mas amplio, pa crea un mercado laboral cla pa futuro, orienta riba demanda, cu ta ofrece empleo sostenible di calidad halto. Pa logra esaki, gobierno mester concentra riba reforsa e match entre oferta y demanda di labor, aumenta transparencia den mercado laboral, y mehorando efectividad di asistencia social (bijstand y onderstand), y politica activo di mercado laboral.

Un di e desaroyonan mas significante den e periodo di reportahe aki tabata e finalisacion di e Agenda Nacional di Mercado Laboral 2023-2026. Desaroya den colaboracion cu stakeholdernan clave – incluyendo dunador di trabao, sindicato y NGO – e agenda aki ta pone e direccion di politica pa reforma laboral. E proximo plan di implementacion pa e agenda ta spera di operacionalisa su prioridadnan mediante proyecto y metrica viable.

Adicionalmente, Aruba a inicia e desaroyo di un sistema di informacion di mercado laboral (LMIS), cu meta pa trece hunto fuentenan di data fragmenta den un dashboard centralisa. E esfuerso aki ta vincula di cerca cu e Sistema Integra di Cliente (ICS), cu ta siendo diseña pa track e ruta di clientenan a traves di servicionan di empleo y asistencia social. Hunto, e sistemanan aki ta bay mehora e habilidad di gobierno pa formula politicanan di labor basa riba evidencia.

E desaroyo di un marco di monitoreo y evaluacion (M&E) pa iniciativanan di mercado laboral tambe ta na caminda. Ministerio di Labor a defini meta y indicadornan preliminar, y ta construyendo un sistema interno di monitoreo. E marco aki ta bay ta crucial pa compronde ki intervencion ta funciona, pa ken, y bao cua condicion – un rekisito fundamental pa legislacion agil.

Reforsa Departamento di Labor

Reforsamento institucional ta continua siendo un pilar di e strategia di reforma. Aruba a completa un analisis funcional y organisacional di Departamento di Labor (DAO), cu a conduci na un plan di restructuracion.

Maske e implementacion ainda ta wardando pa un adoptacion formal, e analisis aki ta sirbi como un blueprint pa alinea e structura di DAO y su rolnan den evolucion.

Ademas, DAO a finalisa ya publica su propio plan di implementacion, cu ta delinea obhetivonan pa bira un agencia pas proactivo, impulsa pa data. E plan ta duna prioridad na mehora herment pa maneho di caso, profesionalisacion di personal mediante training, y mehora servicionan orienta riba cliente.

Otro stap prometedor tabata e progreso haci riba formalisacion di servicio di mediacion di mercado laboral di Aruba. Ta desaroyando marconan legal pa institucionalisa servicionan manera conseho tocante desaroyo di carera y matching di trabao, asina cerando e gap entre esnan buscando trabao y dunadornan di trabao. Sinembargo, e entrega di e servicionan aki ta keda insuficientemente desaroya, y mecanismonan concreto di implementacion ainda ta siendo negocia.

Sistema di Seguridad Social: A pone fundeshi, falta ehecucion
 Pa loke ta Seguridad Social, Aruba a tuma e prome stapnan den direccion di sostenibilidad di sistema mediante un base analitico. Un estudio base riba e ‘safety net’ social a keda completa, ofreciendo perspectivanan detaya riba e manera con ta distribui asistencia, ken ta ricibi esaki, y ki ineficiencia sistematico ta existi. Ta spera cu e analisis aki ta bay informa reformanan den futuro di diseño di asistencia, criteria pa eligibilidad, y mecanismonan di financiamento.

Ademas, Aruba ta preparando pa un revision comprensivo di programanan di seguro social., Mientras cu Ministerio di Asunto Social a establece un plan di maneho, e actividadnan di investigacion y consulta publico ainda no a cuminsa. Igualmente, tampoco tin claridad riba e cronogramanan pa propuestanan di reforma of trayectorianan di implementacion.

Tambe ta haciendo esfuerso pa mehora administracion di asistencia y proceso di pago. ICS, unabes e bay live, ta bay facilita coordinacion real-time entre servicionan social y di labor. Esaki ta priminti di reduci duplicacion, aumenta transparencia y mehora e enfoke di asistencia.

Gap den ehecucion y bottleneck entre agencianan

A pesar di e progreso den pone fundeshi strategico y tecnico, e reformanan di mercado laboral frecuentemente ta stroba pa un falta di capacidad di ehecucion. Hopi iniciativanan ta atrasa pa motibo di limite den personal, falta di claridad den mandato, of responsabilidadnan superponi entre ministerionan.

Un ehempel ilustrativo ta e Servicio di Mediacion di Mercado Laboral: Mientras e marco legal pa e servicio aki ta bao construccion, no ta dunando ningun servicio real, y cooperacion entre DAO y Servicio Nacional di Empleo ta keda minimo. Esaki ta refleha un problema structural mas profundo, esta cu e reformanan hopi biaha ta keda pega den e transicion di planificacion pa implementacion.

Similarmente, e lansamento di ICS a cay atras. Mientras specificacionnan tecnico y preparacionnan piloto ta na caminda, despliegue completo ta atrasa pa retonan di contratacion y integracion. Como resultado, e beneficio di tin intercambio di data directo entre agencianan real-time ainda no ta materialisando.

Coordinacion entre institucionnan tambe ta keda debil den varios area. Maske a consulta diferente stakeholder pa e Agenda di Mercado Laboral, responsabilidad pa implementacion ta fragmenta a traves di varios departamento, conduciendo na confusion riba responsabilidad y ehecucion. Esaki ta complica mas ainda pa reformanan andando den otro sectornan, manera educacion y politica di impuesto, cu ta crusa cu dinamica di mercado laboral pero ta siendo desaroya di manera separa.

A pesar di e obstaculonan, e agenda di reforma ta presenta varios oportunidad pa acelera progreso. Prome, e finalisacion di Agenda di Mercado Laboral 2023-2026 ta duna Aruba un oportunidad unico pa hancra tur esfuerso di mercado laboral den un marco unifica. Sigurando cu e proximo plan di implementacion inclui cronograma cla, agencianan lider, y indicadornan di monitoreo ta bay ta esencial pa ehecucion.

Di dos, inversion den infrastructura digital – particularmente ICS y LMIS – lo por genera progreso rapido si acelera nan. E plataformanan aki ta e pilar di un maneho informa riba data pa servicio di empleo y asistencia social. Nan lansamento exitoso no solo lo simplifica operacion sino tambe duna miho sosten na tracking di resultado.

Di tres, alinea esfuersonan di reforma entre ministerionan – specialmente entre Labor, Educacion, Asunto Social y Desaroyo Economico – lo mehora eficiencia y coherencia politico. Task forcenan of mecanismonan di coordinacion entre sectornan por yuda reduci duplicacion y sigura cu reformanan den un sector ta sostene (en bes di stroba) reformanan den otro.

Finalmente, Aruba por beneficia di asistencia tecnico externo y construccion di capacidad, particularmente den implementacion di reforma compleho manera servicio di mediacion di mercado laboral, digitalisacion di asistencia, y sistema di monitoreo. Usando sosten na nivel di Reino of experticio local por acelera momentum y mehora resiliencia institucional.