(AFP) – Oficial di inmigracion Mericano riba dialuna a los tiro fatal riba un homber identifica pa gruponan derechista como un Colombiano di 26 aña di edad, un incidente cu probablemente lo impulsa critica contra operacion di deportacion di presidente Donald Trump.
E tiramento a sucede na Biddeford, un pueblo di alrededor di 22.000 persona na Maine, y ta yega un siman despues cu agente di Immigration and Customs Enforcement (ICE) a tira un homber Mexicano na Texas fatalmente.
Maine su Procurador General a bisa cu oficial di ICE tabata “ehecutando un operacion di aplicacion relaciona cu un orden final di deportacion na momento cu e suheto a purba huy den un vehiculo den direccion di e oficial y a ricibi tiro fatal.”
El a bisa cu e agente lo haya un suspension di acuerdo cu protocol despues di tiramento involucrando polis. FBI anteriormente a bisa cu e tambe ta conduciendo un investigacion.
Un testigo, Lucas Scott, a bisa medionan local cu el a tende por lo menos 4 tiro despues di mira varios agente di ICE rondona un sedan blanco dialuna mainta.
Maine Immigrants Rights Coalition y Presente Maine, cu hunto a identifica e victima como un Colombiano di 26 aña pero no a duna nomber, a bisa cu e homber tabatin autorisacion pa traha na Merca.
“Nos no lo laga su morto keda reduci na un punto mas pa e administracion aki su estadistica di implementacion,” Crystal Cron, director ehecutivo di Presente Maine a comenta.
Departamento di Seguridad Nacional, cu ta maneha ICE, no a duna comentario inmediatamente.
Senador Angus King di Maine a bisa reporteronan cu e ta compronde, basa riba un combersacion cu Secretario di e departamento, Markwayne Mullin, cu e victima tabata suheto na un orden di aresto di ICE pa su status di inmigracion.
King a exigi un “investigacion completo, transparente y abierto,” pero a bisa cu e agentenan involucra no tabatin un bodycam bisti.
Imagennan di e escena ta mustra tape di polis na un caya residencial, cu un unidad forensico staciona banda di un tent cora.
Manifestantenan a rally den e area cu borchi ta bisa “ICE OUT!” y a reuni na e oficina di Maine su otro senador, Susan Collins, un miembro di Trump su partido Republicano.
“Un persona a muri y nan sernan keri y esnan di e comunidad aki merece contesta cla tocante kico a sucede,” Biddeford su alcalde, Liam LaFountain a bisa den un declaracion.
“Mi ta reconoce e miedo y incertidumbre cu un incidente di e magnitud aki a trece riba nos ciudad.”
Encarga cu e tarea di aplica Trump su campaña contra inmigracion, ICE su agentenan sumamente arma ta enfrenta critica nacional pa tactica agresivo y e morto di dos ciudadano Mericano e aña aki na Minneapolis.
