For di un tempo atras caba, ta mirando un aumento den e cantidad di turistanan cu ta mirando na nos beachnan, y e problema aki ta uno cu ta keda crece y no ta aparenta di tin un solucion den bista.

E hecho cu turismo ta un pilar economico clave pa Aruba ta algo cu tur hende ta reconoce, compronde y acepta. Sinembargo, esaki ta algo cu no mester bin na costo di pueblo su experiencia na cas. Aglomeracion di turista ta birando un problema cu tabata afecta nos beach y a yega di papia tocante esaki anteriormente, pero awor e ta birando un problema cu ta afectando e isla en general, cu cada biaha mas turista den areanan residencial unda realmente, no tin nada dirigi na nan.

Un tempo atras den Bon Dia Aruba nos a papia tocante varios video cu conocido activista Nigel Maduro a comparti riba rednan social, unda por a mira un aglomeracion grandi di vehiculonan UTV/ATV na Tres Trapi. Esaki tabata algo cu a causa conmocion den comunidad, kendenan a expresa nan disgusto tocante e sobreturismo cu nos ta mirando na Aruba.

Antes, Tres Trapi tabata considera como un lama scondi pa localnan por relaha, medita y disfruta di un lama keto y poco satura di turista. Cu e cantidad di turistanan awo presente, e hecho aki ta uno cu a cambia. Te hasta tour y boto ta yegando Tres Trapi y a practicamente converti esaki den otro atraccion turistico, kitando un biaha mas e habilidad di pueblo por disfruta di su propio pais.

E videonan menciona cu a publica a ricibi un cantidad di reaccion y comentario di ciudadanonan cu ta expresa no solamente nan disgusto, pero nan preocupacion pa e naturalesa y e futuro generacionnan di Aruba.

“Esaki lo mata naturalesa. Manera na Baby Beach. Nos sa cu nos ta biba di turista, pero e mester ser controla. Mi a biaha hopi y a mira luganan caminda nan tin un maximo di hende cu ta permiti diariamente. Pero si nan no haci nada e comportacion aki lo destrui e isla,” un usuario a expresa den un comentario.

Otro a comenta: “Nos mes hendenan ta djis golos. Nan ta trece nan na luganan cu ta memey di nos areanan residencial cu ta luganan stima. Tur e tempo ey ta explota nos recursonan natural, perhudica nos naturalesa y e casnan di e bestianan. Tur pa mas placa.”

Hopi ciudadano ta señala e hecho cu e situacion aki ta bisto na diferente parti di e isla, por ehempel na Baby Beach, Mangel Halto, Eagle Beach, cu aunke ta lugarnan cu ta conoci pa atrae turista, e volumen di persona ta birando hopi.

Y actualmente, esaki ta bisto tambe na partinan residencial di Aruba, cual no ta designa como un destino turistico y tampoco tin acomodacion turistico. Ademas di un impacto na nivel ambiental y ecologico riba nos beachnan, esaki tambe tin un impacto riba e bida diario di residentenan, entre otro den trafico cu turistanan cu no ta conoce nos reglanan di trafico y ta core di manera inadecua riba caminda.

Recientemente a trece esaki dilanti atrobe riba rednan social, señalando via video y imagennan publica riba Facebook cu te ainda ta mirando e aglomeracion aki riba beachnan. E mesun activista anteriormente menciona, Nigel Maduro, a haci un publicacion riba Facebook ayera, un biaha mas ilustrando e problema cu Aruba y su pueblo ta enfrentando. E publicacion a haya diferente reaccion di pueblo, cu algun comentando “ki dia Aruba lo mira cu nos no por practica turismo riba escala grandi na un isla di escala chikito… dimas” y otro comentando “waw, esaki ta Aruba??”

Nos a menciona anteriormente cu tin hende ta punta dede riba gobierno, pasobra nan ta esunnan cu ta duna permiso pa e tournan por yega para na e lugarnan aki, nan ta implementa maneho di e companianan aki y esaki, for di punto di bista di varios ciudadano, no ta bayendo den forma corecto. Di otro banda tin hende cu ta compronde cu Aruba su pilar economico principal ta turismo y ta un aspecto esencial pa e isla y su hendenan por sobrevivi, pero esey no ta kita cu mester tin un miho manera.

Sinembargo, e problema te ainda ta persisti y no tin responsabilidad ni sikiera expresion di tin e intencion di atende cu esaki. Si sigui laga e problema aki sin atencion y sigui crece, lo yega un dado momento unda localnan di Aruba no lo tin nada cu lo por yama ‘cas.’