AHATA a analisa e trayectorio di estadia den dato di turismo pa prome mita di aña 2025. Comparando dato Januari-Juni 2018 cu Januari-Juni 2025 (publica pa A.T.A.), e cifranan ta ilustra cu alohamento na “AirBnB” (Vacation Rental) a duplica. Mientrastanto, alohamento na hotel a baha un tiki.
AHATA ta representa tur alohamento (incluyendo Vacation Rental) y e industria en general, y ta indica cu e cifranan aki unda e crecemento grandi den nos turismo a tuma lugar. Mientras cu e patronchi ta similar cu desaroyo di e industria di turismo mundialmente, ta importante pa reconoce cu e segmento falta di regulacion na Aruba.
AHATA ta sigui boga pa Aruba introduci leynan cu ta rekeri registracion pa e sector di Vacation Rental. Nos meta ta pa logra un mercado di alohamento balansa y sostenibel, caminda tur proveedor ta opera bao di e mesun reglanan y ta contribui debidamente na Aruba su prosperidad. Esaki ta clave pa sigura e seguridad socioeconomico di hopi famia Arubano.
Cu registracion obligatorio por logra miho bista riba e inventario di e sector, por implementa regulacion y por logra miho cumplimento di pago di impuesto. Un sector bon controla ta yuda fortalece entrada di gobierno, cu na su turno ta financia programanan social den nos comunidad y yuda mantene nos infrastructura publico cu ta beneficia tur bishitante y residente.
