Aruba Hotel & Tourism Association (AHATA) a pidi di minister di Labor, Glenbert Croes, un garantia of confirmacion cu a haci cambio na e maneho cu tabata prohibi un prome permiso di trabao na Aruba pa stranheronan.

CEO di AHATA, Tisa LaSorte lo a pidi e minister pa e claridad aki den un carta, na cual portal noticiero NoticiaCla a haya acceso, segun NoticiaCla a reporta.

Segun LaSorte a bisa den e relato, tin confusion y ‘no tur hende ta riba mesun liña’ riba e tema aki. La Sorte a destaca cu recientemente tabatin un reunion cu Departamento di Progreso Laboral (DPL), e instancia cu ta encarga cu maneho di asuntonan di labor, y durante e reunion aki, aparentemente nan a informa LaSorte cu nan no a haya ningun instruccion di minister Croes relaciona cu cambio di maneho pa prome permiso di trabao.

Segun e relato di NoticiaCla, den e carta LaSorte ta splica cu durante un reunion cu LaSorte, y tambe na e asamblea di AHATA, e mandatario a confirma cu el a cambia su maneho relaciona cu prome permiso di trabao, specificamente, cu a elimina e prohibicion temporal riba prome permiso di trabao. E prohibicion aki a keda implementa durante e pandemia di Covid-19; segun a indica, e motibo tabata pa purba di salvaguardia cuponan di trabao pa residentenan local.

Sinembargo, mirando cu a surpasa e pandemia generalmente, y cu cosnan ta bayendo back na normalidad unda ta nota un recuperacion economico, lo a scoge pa elimina e prohibicion riba prome permiso di trabao pa stranheronan.

Pero na momento cu LaSorte a tene su reunion cu DPL, el a haya e sorpresa cu DPL no tabatin conocemento di e cambio, ni a haya instruccion indicando cu tin un maneho diferente na e prohibicion riba prome permiso di trabao pa stranheronan.

LEAVE A REPLY

Please enter your comment!
Please enter your name here