Cancer ta un di e causanan mas grandi di sufrimento humano conoci. Casi tur lector lo a wordo afecta indirectamente of te hasta directamente door di e malesa aki.

Un parti hopi grandi di e progreso di nos civilisacion humano ta cu mas y mas nos por trata y te hasta preveni diferente malesa. Door di esaki nos a wak cu desde 1900 pa cu 2023, e expectativa di bida a hisa di 30 aña te cu 73, cual ta un logro sumamente grandi pa nos civilisacion. Awo den e milenio aki, nos ta wak mas y mas progreso pa cura e malesanan cronico di mas erg, incluso cancer. Den e columna aki nos lo wak con AI ta yudando den e lucha contra cancer y con porta den nos generacion actual por wak un cura pa e malesa aki.

Premio Nobel 2024: AlphaFold

Na nivel celular nos tin di haci cu miyones di diferente proteina, tambe tur proteina ta interactua cu otro, y tambe tin e factor di leynan di fisica den tur esaki. Obviamente pa un ser humano, ni maske con sabi e por ta, pa visualisa e miyones di proteinanan aki ta simplemente imposibel. Awo un programa di AI, for di Google, yama AlphaFold, por yuda visualisa proteina. Prome cu 2020, ora cu AlphaFold a wordo publica, e por a costa diferente aña y miles di US Dollar pa visualisa solamente 1 proteina. Awo den menos cu 5 aña, cientificonan rond mundo usando AlphaFold ta descubriendo miles di structura riba base diario. Door di esaki na 2024, e team tras di AlphaFold a ricibi e Premio Nobel di Kimica.

AI ta diseña medicina nobo

Pa trece un medicamento nobo riba mercado ta un proceso di casi 1 decada y ta literalmente costa mas cu $1 biyon US Dollar. E usonan di AI den designa medicamentonan nobo, ta den casi tur area di esaki.

Na prome lugar un AI por haci uso di datasets di DNA di miles di pacient, pa cu su proceso di descubri targets medico nobo. Tambe e por designa molecule cu hopi menos side-effect cu antes. E por tambe asisti den e diseño di un clinical trial, y te hasta optimalisa full e dosis cu un pacient mester ricibi di un medicamento nobo. Danki na e revolucion di AI, tin hopi speransa cu diferente medicamentonan moderno por wordo inventa pa un fraccion di e prijs y tempo cu esaki tabata costa antes, cu lo beneficia full sociedad den un manera profundo.

E vacuna contra cancer
 Esaki ta trece nos na e zono mas grandi casi den ramo di medicina, esta e vacuna universal contra cancer. Usando e tecnologia di mas avansa, cientificonan awo ta experimentando cu traha un vacuna di cancer personalisa, usando un pacient su mesun celnan.

E speransa ta cu den un futuro no mucho leu, un vacuna por yuda cura un pacient di cancer, y proteg’e contra e regreso no di solamente 1 tipo di cancer pero casi tur sorto di malesa maligno. Dentro den e siguiente añanan e prome generacion di e tipo di vacunanan aki lo cuminsa drenta clinical trials. Cu esaki nos lo por tin e speransa cu porta por crea e prome stap pa un cura universal contra cancer.

Den siglo 20, nos a progresa inmensamente como sociedad humano, e promesa di e siglo aki, ta cu e progreso aki no lo solamente sigui, pero acelera tambe. Un simbolo di sufrimento y morto, esta un malesa manera cancer, por bira te hasta e simbolo mas grandi di progreso den medicina, cu speransa dentro di e siguiente 10 aña.