“AI pa Pueblo”: Encuentro informativo cu Centronan di Bario como prome paso pa haci informacion tocante AI mas accesibel pa pueblo

Lider di fraccion PPA, Eduard Pieters a organisa un encuentro informativo riba e topico di Inteligencia Artificial hunto cu dos experto den e area, Simon Waslander y Aaron Bislip, cu e meta di trece e tema mas cerca di comunidad. E iniciativa a tuma luga pa brinda informacion na varios centro di bario tocante proyecto “AI pa pueblo”. E proyecto ta enfoca riba educacion y conscientisacion tocante e impacto y uso di Inteligencia Artificial den bida diario, enseñansa, negoshi y desaroyo comunitario.

Segun Pieters, e iniciativa ta conecta directamente cu e vision di PPA manera cu ta describi den su plan presenta durante campaña “Mi Aruba 2050”, unda e partido ta pone enfasis riba desaroyo comunitario, educacion y fortalecemento di centronan di bario. E fraccion ta considera cu centronan di bario por hunga un rol importante como punto di encuentro pa desaroyo personal y educacion di comunidad. Dentro di e contexto ey, Inteligencia Artificial ta ser mira como un tema actual y relevante cu lo sigui hunga un rol importante den futuro di sociedad.

Pieters a indica cu despues di conoce e dos experto y discuti cu nan tocante e posibilidadnan di Inteligencia Artificial, el a haya cu e tema fit bon cu e metanan cu PPA tin pa Aruba. Esey a resulta den e decision pa organisa e sesion informativo pa centronan di bario como un prome paso pa haci e informacion mas accesibel pa pueblo.

“Inteligencia Artificial ta algo cu nos no por biba sin dje mas, e t’ey, nos no por repimie, nos no por bisa nos ta hal’e un banda pasobra e ta bay keda y di aworaki pa dilanti e ta bay keda. Solamente nos tin cu bay haci miho uso di dje,” Pieters a enfatisa.

Durante e encuentro a ser discuti con diferente grupo den comunidad por beneficia di Inteligencia Artificial. E oradornan, Waslander y Bislip, a menciona cu e tecnologia no ta limita solamente pa hoben of profesionalnan, sino cu tambe mucha, adulto mayor y doñonan di negoshi chikito of mediano por haya bentaha den e uso di AI. Segun e presentacion, Inteligencia Artificial por yuda studiantenan cu nan lesnan di scol, yuda emprendedornan traha business plan of amplia servicio, y tambe contribui na desaroyo personal y profesional di diferente grupo den sociedad.

Un punto importante durante e charla tabata e idea cu Inteligencia Artificial ta algo cu ya ta parti di realidad diario y cu sociedad no por ignora su presencia. E oradornan a enfatisa cu tecnologia ta sigui avansa rapidamente y cu e reto principal ta siña con pa usa e herment di manera responsable y positivo.

Segun e informacion comparti durante e encuentro, educacion ta ser mira como e prome paso pa logra un uso responsable di Inteligencia Artificial. E enfoke principal ta pa yuda comunidad compronde kico Inteligencia Artificial ta, con e funciona y cual ta e beneficio como tambe kico ta e riesgonan cu por bin hunto cu su uso. Tambe a ser menciona importancia di privacidad, seguridad y e necesidad pa preveni uso negativo di e tecnologia.

Representantenan di diferente centro di bario tambe a comparti nan punto di bista riba e iniciativa. Centro Famia Piedra Plat a expresa cu nan ta mira e proyecto como un oportunidad pa brinda muchanan cu ta participa den nan huiswerkbegeleiding e posibilidad pa siña mas tocante Inteligencia Artificial y con e por yuda nan den nan estudio. Segun e representante, tambe tin hopi adulto cu ta participa activamente den actividadnan comunitario y cu por beneficia di mas conocemento tocante e tecnologia nobo aki.

Un representante di Centro di Bario Playa Pabou a indica cu e iniciativa ta importante pasobra mundo ta cambiando y comunidad mester prepara pa e cambionan ey. El a sigui splica cu sociedad no por evita of ignora e desaroyo tecnologico, sino mester concentra riba alfabetisacion y preparacion pa e innovacionnan moderno cu ta surgi.

El a menciona tambe cu Aruba, como un pais cu depende hopi riba su recurso humano, tin necesidad di sigui inverti den conocemento y desaroyo di su poblacion. El a enfatisa cu, ademas di resolve problema diario, ta importante pa pensa den vision y den con pa crea oportunidadnan nobo pa futuro. Dentro di e contexto ey, Inteligencia Artificial ta ser considera un herment cu por contribui na innovacion y progreso.

Simon Waslander y Aaron Bislip a comparti informacion tocante nan meta cu e proyecto. Nan a indica cu Inteligencia Artificial ya tin impacto riba casi tur aspecto di bida moderno y cu Aruba no por keda atras den e desaroyo ey. Segun nan, ta importante pa comunidad haya un nivel basico di comprension y participacion den e tema, algo cu nan a describi como “AI literacy.”

Nan a splica cu comunicacion cu Inteligencia Artificial lo bira cada biaha mas importante den e añanan binidero. E capacidad pa comunica cu AI y saca bon resultado di dje ta ser considera un habilidad nobo cu por hunga un rol esencial den futuro. Esey ta e motibo pakico nan ta desea di contribui y amplia conocemento basico di AI pa yega na henter comunidad.

Durante e sesion informativo nan a presenta dos componente principal di e proyecto. E prome componente ta un introduccion general tocante AI, unda participantenan ta siña kico Inteligencia Artificial ta, cual ta e aspecto positivo di dje y cual ta e puntonan cu mester atencion, manera privacidad, seguridad y posible uso negativo. E segundo componente ta enfoca riba uso etico di AI y manera con e tecnologia por ser usa pa obhetivo positivo den comunidad.

Segun e oradornan, e charlanan ta adapta dependiendo di e audiencia. Esey kiermen cu e contenido por ser ahusta pa mucha, adulto, profesionalnan of otro grupo specifico dependiendo di necesidad di e comunidad. Nan a enfatisa cu e obhetivo principal ta pa motiva hende, crea dialogo y reuni diferente sector di sociedad pa combersa riba e impacto di Inteligencia Artificial.

PPA a indica cu e proposito final di e iniciativa ta pa sigui promove educacion y desaroyo den comunidad. Segun Pieters, despues di e prome encuentro informativo, e responsabilidad awor ta den man di e centronan di bario y na e profesionalnan, Waslander y Bislip, pa sigui desaroya actividadnan y programa relaciona cu AI den nan respectivo comunidadnan.

“Educacion, esey PPA ta para p’e. Danki na e dos profesional cu a yuda. Aworaki e bala ta den nan scochi pa nan por sigui cu e desaroyo aki den e centronan di bario pa desaroyo y educacion di comunidad,” el a subraya.

E encuentro a mustra cu tin interes creciente na Aruba pa explora e posibilidadnan cu Inteligencia Artificial ta ofrece, mientras cu na mesun momento tin atencion pa e necesidad di educacion y uso responsable. E organisadornan ta spera cu e iniciativa lo contribui na un comunidad mas informa y mihor prepara pa e cambionan tecnologico cu ta sigui desaroya mundialmente.