Petros Aquaculture Operations, e compania cu kier cuminsa cria pisca Northern red snapper den lama di Aruba, a laga traha un rapport di impacto ambiental (MER), den cual ta detaya e posibel impacto riba naturalesa y medio ambiente. Minister di Finanzas, Asunto Economico y Sector Primario di Aruba a pidi Comision pa Reportahe di Impacto Ambiental un opinion independiente riba e MER. Den e conseho, e Comision ta expresa su opinion riba e calidad y totalidad di e MER, teniendo na cuenta, entre otro, su coreccion y relevancia pa toma di decision.
E Grupo di Trabao di e Comision a bishita Aruba y e sitio di proyecto riba tera durante e siman di 20 di januari 2025, y a topa cu representantenan di Gobierno di Aruba7, Petros y personanan interesa externo
Segun e rapport di e Comision, en total, Petros tin como meta pa produci te cu 500 ton di pisca pa aña den e prome fase di cuater aña y finalmente 2.000 ton pa aña den e di dos fase. Un parti ta destina pa consumo local, un parti pa exportacion. E proyecto ta consisti di un criadero di pisca, un planta di procesamento y un pier riba tereno. Riba lama, mas o menos ocho kilometer for di costa, e proyecto ta consisti di cuater haula di pisca (bao awa) den e prome fase y diesseis haula den e di dos fase. E diesseis haula ta cubri un area di aproximadamente 1 km2 y ta hancra na tera. Barconan lo nabega bay bin varios biaha pa dia pa suministra y saca pisca y pa cuida e pisca. Ademas, tin transporte di tera (pa y for di haf y aeropuerto) y transporte di cuminda pa pisca y pisca fresco den avion.
Kico tin den e MER?
E MER ta enfoca exclusivamente riba e prome fase di e proyecto.
Riba tera, e proyecto lo ta situa riba un tereno industrial. E peso riba medio ambiente relacion cu zonido, holor, awa sushi y calidad di aire ta aumentando.
E calidad di awa di lama por baha debi cu e proyecto di criansa di pisca ta usa awa di lama y ta descarga un cierto cantidad back den lama despues di tratamento. Awa di sushi di procesamento di pisca ta bay na e planta di tratamento di awa di riool (RWZI) local existente. E disponibilidad y calidad di awa di tera por deteriora durante e fase di construccion y uso.
Aunke no a observa ningun especie di bestia of mata protegi na Aruba na e localidad di plan, especie di bestia local manera parha y lagadishi si ta presente. E fasenan di construccion y uso por stroba e especienan aki. Desperdicio solido di procesamento di pisca por atrae bestia manera raton y djaca.
E parti di e proyecto riba lama ta situa mas o menos ocho kilometer for di costa. Pisca den e haulanan ta produci residuo cu ta caba den lama y ta plama. E MER ta bisa cu e concentracion di e particula aki ta wordo verdun lihe door di e fluho y turbulencia. Como resultado, un aumento den concentracion no ta midibel mas na un distancia cortico (50 pa 100 meter) for di e haulanan. Pa e motibo aki e impacto riba e ecosistema marino ta limita den bisindario cercano di e haulanan, pero e ta contribui na e peso total riba e ecosistema mas grandi di Lama Caribe y Golfo di Mexico. E peso total di sobrecarga ta significativo caba.
E MER ta bisa cu tur efecto negativo riba medio ambiente ta limita.
Pa e area di tera, esaki ta principalmente pasobra e impacto ambiental existente di e tereno industrial ta halto caba y e aumento como resultado di e plan propone ta relativamente chikito.
Riba lama, e efectonan ta limita den relacion cu e ecosistema marino mas grandi di Lama Caribe, segun e MER.
Kico ta e conseho di e Comision riba e MER?
E conseho aki ta un ‘conseho preliminar’. Gobierno di Aruba a indica cu lo adopta e recomendacionnan di e Comision, lo laga complementa e rapport di impacto ambiental den futuro cercano y despues bolbe entrega esaki na e Comision pa un recomendacion final.
E MER ya ta duna un bista rasonabel y completo di e impacto ambiental di e proyecto y medidanan di mitigacion. E MER ta duna un bon bista di e impacto ambiental actual riba tera via di conteo di trafico y midimento di contaminacion di zonido y calidad di aire. E MER tambe hopi biaha ta contene un bon descripcion di e situacion existente di e ecosistema marino.
Ainda falta algun informacion esencial riba un cantidad di componente. Un aspecto positivo ta cu Petros kier aplica e ‘Miho Practicanan di Aquacultura’ y e criterionan di ‘Conseho di Maneho Responsabel di Aquacultura’.
Den e MER ta menciona cu e proyecto aki ta contribui na diversificacion economico di Aruba den combinacion cu fortificacion di seguridad di cuminda. E Comision ta conclui for di e MER cu e proyecto aki solamente ta fortifica e seguridad di cuminda local den e capa superior di e poblacion Arubano. Na final, e producto final, e pisca produci, ta destina principalmente pa restaurantnan di luho, e sector di turismo y exportacion. E Comision ta recomenda pa e autoridad competente tene cuenta cu esaki ora di evalua e utilidad y necesidad di e proyecto.
E Comision ta identifica un cantidad di incertidumbre.
E factibilidad di e proyecto ta dificil pa pronostica pasobra e Northern red snapper ainda no ta wordo produci comercialmente otro caminda y no ta sigur si e especie aki por sobrevivi den haula den awanan di Aruba.
Ademas, tin incertidumbre tocante e consecuencianan pa e ecosistema marino, loke tambe ta un fuente di preocupacion cerca e personanan interesa. Pa e motibo aki e Comision ta recomenda pa construi un momento di decision despues di fase 1. E ta recomenda tambe cu e decision riba si mester escala te na 2.000 ton o no mester ta basa riba un bon y sistematico monitor y evaluacion di e prome fase di e proyecto.
Ademas di e recomendacionnan aki, e Comision ta tuma nota cu falta informacion importante ora di evalua e MER.
E siguiente puntonan ta involucra:
Ainda falta bista riba e componentenan di e proyecto riba e siguiente puntonan: un bista actual di e plan di instalacion proyecta na e localidad di e proyecto y e area di plan riba tera inclui su limitacionnan. E descripcion di fuentenan relevante di holo y zonido denter di e proceso di procesamento riba tera; e forma cu ta suministra awa na e criadero di pisca, cuanto awa, cuanto ta descarga y e impactonan ambiental; e forma cu ta preveni contaminacion di e lagun di Barcadera durante e limpiesa y mantencion di e barconan; e ubicacion y hancramento di e pier y e consecuencia ambiental; un bista di e trafico di barco y transporte riba e pier y camindanan publico y e impacto ambiental di transporte.
Impacto ambiental na 2.000 ton. E MER ta trata e impacto ambiental di fase 1. Un bista cuantitativo di e impacto di fase 2 ta necesario pasobra e fase aki ta un parti integral di e proyecto y ta esencial pa operacionnan empresarial rendabel.
Opcionnan pa procesa awa di sushi. E MER no ta demostra cu RWZI tin suficiente capacidad pa procesa awa sushi di e proyecto, awor y den futuro. Ademas, tin un falta di bista riba e posibilidadnan pa purifica awa sushi na e luga di e proyecto si e RWZI no tin suficiente capacidad.
Impactonan ambiental riba tera y lama. E impacto ambiental acumulativo riba tera pa contaminacion di zonido, calidad di aire, contaminacion di holo y fluhonan di trafico no a wordo traha, tampoco e impacto riba Rooi Bosal, un incision natural na costa cu mangrovenan (incluso medidanan di mitigacion). Tambe insuficiente elabora ta e consecuencianan pa ecosistema marino.
Consecuencianan social y socioeconomico. No a describi adecuadamente e consecuencianan pa piscadonan local. Industria di turismo ta preocupa cu e haulanan riba lama lo atrae tribon, cu despues lo por aparece mas cerca y mas frecuente cerca di beach. E riesgo aki tampoco ta describi di forma suficiente.
Sistema di maneho di medio ambiente, plan di monitor y momentonan di toma di decision. E MER ta rekeri un miho bista den e cadena di toma di decision (momentonan di tuma/no tuma decision) y den e manera cu ta maneha y monitoria consecuencianan ambiental y social. Haci e sistema di monitor SMART6. Imagen general di e proyecto y impacto ambiental den resumen. Aunke e informacion den Anexo 37 di e MER ta hopi cla riba un cantidad di punto, locual ta falta awor ta e bista general.
Conceptonan di decision no ta disponibel ainda
E MER ta destina pa sostene decisionnan (incluso permisonan) pa e proyecto. E decisionnan aki no ta disponibel ainda (den concepto). Como resultado, e Comision no por a verifica si e MER y e decisionnan ta consistente cu otro, por ehempel si e MER ta analisa e impactonan maximo riba medio ambiente permiti den e decisionnan. Ta coresponde na e instancia competente pa investiga esaki riba un fecha indica despues.
