Departamento di Impuesto di Aruba ayera mainta a informa cu pa aña 2021 nan tin 89.489 number di auto registra cu ta aumenta cada aña y 81% di e cantidad aki a paga nan impuesto di auto completo pa aña 2021.
Asina Meverly Romano PR di DIMP a informa ayera den un conferencia di prensa. Y tambe a bisa cu 81% ta representa e cantidad 72.373 number na unda el a sigura cu ora nan ta surpasa 80% nan ta den bon caminda, e incumplimento a bira 16% un total di 14.177 number cu no tin pago riba dje cu ta cay den e categoria di plachi A.
3% di e cantidad di numbernan cu nan tin registra cu ta un total di 2.739 ta automobilista cu a entrega nan plachi di number indicando cu nan plachi no tin uso, “esunnan cu nan auto actualmente no ta den uso, por fabor entrega e plachi di number na DIMP”, Romano tambe a bisa cu dia 3 di januari te ultimo fecha pa entrega esey sin cu mester paga impuesto.
Tambe, el a trece dilanti cu nan a haya un notificacion di Cuerpo di Polis na unda nan a indica cu riba caya tin automobilista cu a señala cu nan a paga e number pero nan no a haya e plachi, pa cu esaki Romano a enfatisa cu pa aña 2022 no ta bay tin plachi number nobo, tur auto mester keda usa su plachi blanco cu cora pero impuesto si mester wordo paga.
Manera DIMP a duna di conoce for di basta tempo pasa, e gasto di plachi di numbernan ta basta halto y debi na e situacion financiero, loke ta nifica cu comunidad lo sigui usa e plachi blanco cu cora pa aña 2022.
Tambe el a señala cu nan tin un cantidad di 254 brommer cu no tin pago mes di aña 2021, na unda cu si e brommer no ta den uso tambe tin cu entrega e plachi number.
