Segun Minister di Infrastructura, Desaroyo Teritorial y Medio Ambiente, Marisol Lopez-Tromp, nan ta trahando aworaki pa prepara e maneho di tereno di huur.

El a trece trankilidad pa esnan den comunidad cu ta planta caba pa añanan, pero tambe pa esnan cu ta interesa pa inicia un actividad of proyecto riba agricultura. El a bisa cu te ainda tin tur tempo pa sigui haci e peticion aki.

Den e maneho aki departamento di Infrastructura y Planificacion (DIP) ta bay cuminsa y reconfirma peticionnan di esnan cu kier planta of tabata planta. E proceso aki ta pa actualisa nan datonan.

Te ainda niun tereno a wordo otorga, director di e departamento aki, Haime Croes a confirma na Bon Dia Aruba. Nan ta bezig registrando ainda. DIP ta spera cu nan ta cera pronto e proceso aki pa cuminsa mas lihe cu ta posibel nan actividad di agricultura. Pa esunnan cu ta cumpli cu e criteria di otorgamento di tereno di huur.

E mandatario a splica cu nan tin pa añanan datonan, pero no tur ta actualisa y nan a cuminsa cu e proceso aki caba. “Nos kier stimula tur esnan cu ta interesa seriamente den dje,” el a bisa. Agricultura ta un sector cu gobierno kier desaroya pa diversifica nos economia. Pero tambe pa garantisa siguridad alimenticio pa nos comunidad.

Igualmente, Lopez-Tromp a referi riba proteccion di nos naturalesa. El a bisa cu esaki ta un di e atraccion of meta cu nos bishitantenan ta bin Aruba pa aprecia cosnan autentico. Pero hopi di e aspecto aki a sufri daño. El a bisa cu gobierno kier evita cu esaki por bira pio. P’esey den ROPV nan a bin cu 16 area protegi y reforsa nos ley encamina pa protege nos medio ambiente.

El por a mira con durante e situacion di e pandemia di Covid-19 cu a obliga nos keda na cas, imagennan a wordo divulga di bestianan cu a cuminsa sali, mata a crece bek y awanan a bira mas limpi. “Ta cos cu bo kier cuida y mantene,” el a bisa.