Durante weekend noticia a surgi tocante e status medico di e criatura di cinco aña di ken su caso di abandono den auto a sacudi pueblo y a resulta den un translada urgente pa hospital na Colombia unda awor e ta bao tratamento critico.

E caso di Alexander a causa gran indignacion den pueblo despues cu a hay’e inconsciente den auto, supuestamente cera eyden pa cinco ora largo.

Diasabra mas noticia a sali riba red social via plataforma noticiero ATK notisia y mas, unda a comparti e status di e mucha cu actualmente na Colombia hunto cu su mama y tata. Segun e medio ta reporta, resultado di test di MRI cu a haci diabierna ultimo a mustra cu daño cerebral tabata menos cu loke a anticipa, cual ta un señal prometedor pa Alexander.

Segun a sigui reporta, diasabra a cuminsa baha remedi di sedacion poco poco pa mira si e criatura lo por lanta riba su mes. Tambe a observa movemento, Aunke Alexander ainda ta inconsciente, a nota cu e ta moviendo su curpa si, cual ta indica na dokternan cu tin bida ainda. Segun e medio ta comparti, el a hasta purba ranca tubo. Pa e motibo aki dokternan mester a mar’e un poco pa su mesun seguridad.

A pesar cu Alexander ta desafiando expectativanan caba, dokternan ta enfatisa cu ainda no por bisa cu certeza kico e consecuencianan pa e mucha lo ta, ya cu e ta creciendo ainda. Pa por tin un bista mas cla, mester conduci varios test durante e proximo dianan.

Den comentarionan di e publicacion, centenares di usuario a expresa nan alivio y ta sigui resa y duna apoyo na e criatura y su famia.

Diamars atardi comunidad a ser sacudi pa e noticia cu un mucha homber di 5 aña a ser lubida den un vehiculo di e crèche cu e ta bishita cu consecuencia cu el a stop di reacciona y su curason a para.

Segun informacion oficial di Cuerpo Policial di Aruba, diamars atardi central di Polis a ricibi notificacion door di AC (alarm central) di un caso serio na unda cu un mucha homber di 5 aña a yega na Imsan y e no tabata reacciona.

Di biaha dokter y persona na Imsan a cuminsa cu reanimacion y a traha hunto pa asina por a logra haya un pulso.

Segun prome informe di Polis, a haya e mucha homber den un vehiculo cu ta ser usa pa transporte di mucha, di scol pa e crèche cu e ta bishita. Segun informacion, na momento cu a haya e mucha homber ya e tabatin basta rato den e vehiculo y no tabata reacciona.

E caso ta den man di autoridadnan concerni pa asina investiga kico a pasa.