Boekhoudt huramenta (1).jpg

Diaranson Alfonso Boekhoudt a huramenta como gobernador nobo di Aruba, dilanti Su Mahestad Rey Willem-Alexander. Pa e ocasion aki, nan a ricibi sr. Boekhoudt na Paleis Noordeinde.

 

Entrante 1 di januari 2017, Sr. Boekhoudt lo asumi su puesto como gobernador di Aruba.

E nombramento di Sr. Boekhoudt como gobernador a causa controversia, como cu gabinete Eman no ta di acuerdo cu su nombramento. Esaki pa motibo cu sr. Boekhoudt no tabata un di e candidatonan riba nan lista.

 

Minister di Asunto di Reino na Hulanda, Ronald Plasterk, mes a bin cu e candidatura di parti di e Conseho di Minister di Reino. Esaki pa motibo cu nan no por haya nan mes den e candidatonan di Aruba. E candidato prefera di gabinete Eman tabata Angel Bermudez, e minister di Financia actual.

 

Momento cu e Conseho di Reino a dicidi riba Sr. Boekhoudt, prome minister Mike Eman a manda un carta pa su colega Hulandes Mark Rutte, exigiendo pa revoca e nombramento. Tambe el a puntra pa un encuentro cu a tuma luga un poco despues cu minister Plasterk. Nan a yega un acuerdo unda prome minister di Aruba a bisa cu lo acepta e nombramento. Un relato di ambos gobierno a sali, anunciando esaki. Pero no a tarda mucho ora gobierno di Aruba a saca su mesun relato bisando cu minister Plasterk a admiti cu nan a comete erornan grave.

 

E siman aki den un reunion na parlamento prome minister Eman atrobe a expresa cu e procedura no a bay den un forma corecto y contra autonomia di nos pais. Riba mesun dia minister Plasterk a contesta riba preguntanan di un parlamentario Hulandes cu e procedura cana tabata uno legitimo.

 

Asina ambos partidonan te awor ta keda dividi riba e asunto di nombramento pero gabinete Eman a declara tambe cu no lo bringa esaki mas. Kico e controversia ta nifica pa e futuro relacion como cu Sr. Boekhoudt tambe lo bira e hefe di gobierno di Aruba, no ta conoci.

 

Mensahe di Gobernador nobo pa Aruba

Sr. Boekhoudt tambe a manda un mensahe pa Aruba durante e huramento:

“Apreciabel conciudadanonan, awe mainta na Palacio Noordeinde aki na Den Haag Hulanda a tuma luga e acto di huramentacion, pa mi persona ricibi e autorisacion oficial di Su Mahestad Rey Willem-Alexander pa sirbi den e funcion di Gobernador di Aruba entrante 1 di januari 2017.

Na prome luga ami y mi famia ta profundamente agradecido na Gobierno y Pueblo di Aruba pa e confiansa cu a wordo brinda na mi pa sirbi nos pais den calidad di Ministro Plenipotenciario, y awor cu mi rol ta cambia pa uno di mayor responsabilidad, mi compromiso ta keda mescos cu nos pais. Lo mi sirbi Aruba y Reino cu e honor y respet cu nan merece. Mi lo haci mi maximo esfuerso pa eherce e mesun bon trabao cu mi predecesornan a haci den e funcion di Gobernador di Aruba. Masha danki pa tur felicitacion y palabranan di apoyo ricibi.”

 

No ta conoci ainda ken lo bira e minister Plenipotenciario nobo. Gobierno di Aruba a duna sr. Boekhoudt su retiro entrante di 1 november pa motibo di falta di confiansa.