Recientemente Algemene Rekenkamer Aruba (ARA) a publica e Quality Assurance Review (QAR) Report cu INTOSAI Development Initiative (IDI) a realisa tocante e audit di ARA riba Strong and Resilient National Public Health Systems liga na SDG 3d. E rapport ta duna bista valioso riba areanan di cumplimento ARA cu e normanan di e Institucion di Audit Supremo (ISSAI) y ta resalta areanan pa mehoracion.

Den luna di april ARA a ricibi e rapport QAR y dia 24 di juni 2025 nan a manda IDI un carta den cual nan ta reconoce e importancia di e resultadonan di QAR den fortalece Aruba trayecto pa cumplimento cu ISSAI. ARA ta remarca cu nan a revisa e recomendacionnan suministra y ta tumando accionnan pa mehora calidad di audit y cumplimento cu e normanan di audit di rindimento di ISSAI.

Na maart 2023 ARA a publica su rapport Strong and Resilient National Public Health Systems den cual nan a presenta e conclusionnan di su investigacion riba e medidanan di gobierno [Gabinete Wever-Croes] pa haci Aruba su sistema nacional di cuido medico mas resiliente. E investigacion aki ta mara na e Metanan di Desaroyo Sostenibel (SDG) 3d.

E obhetivo principal di e investigacion tabata pa evalua te na ki grado gobierno a tuma accionnan pa fortalece e capacidad di e sistema di cuido di salud pa pronostica, preveni y prepara pa riesgonan di salud publico. Tambe a analisa con gobierno a construi riba y siña for di sucesonan den sector di salud publico.

E investigacion aki a ser conduci como un audit cooperativo cu participacion di 34 pais rond mundo, bou di guia di IDI. NA april di e aña aki IDI a presenta na ARA su Quality Assurance Review (QAR) Report tocante e proceso di audit di e investigacion di ARA.

E obhetivo principal di e QAR ta pa determina si e investigacion, Strong and Resilient National Public Health Systems (SRNPHS) realisa pa ARA, ta cumpli cu e Standard INTOSAI aplicabel pa Institucion Supremo di Auditoria (ISSAI). E QAR ta ofrece un evaluacion independiente di calidad di auditoria colaborativo cu ta ser apoya pa IDI. E ta ofrece informacion riba e resultadonan di e apoyonan y ta ofrece recomendacionnan pa ARA pa mehora calidad di su auditorianan y su sistema di control di calidad.

E QAR ta consisti di cinco pregunta riba e cumplimento di ARA su investigacion SRNPHS, cu e rekisitonan di calidad y bon practica. E prome pregunta ta adresa e rekisitonan general riba auditorianan sectoral publico, y e otro cuatro pregunta ta relaciona cu e etapanan di e proceso di auditoria di rindimento: planificacion, realisacion, rapport y siguimento.

Basa riba su examinacion IDI a recomenda pa Algemene Rekenkamer Aruba (ARA) adopta un proceso documenta di seleccion y evaluacion di competencia di miembro di ekipo di auditoria di rindimento; documenta e procedemento di coleccion di dato y analisis di dato den un manera suficientemente completo y detaya pa permiti cu un revisor independiente por compronde e plan di auditoria; y sigura cu ta haci follow up riba auditorianan di rendimento y cu e resultadonan corespondiente ta raporta, segun necesario.

E QAR a conclui cu e investigacion SRNPHS realisa pa ARA ta cumpli cu e rekisitonan general y paso-paso di ISSAI pa un auditoria di rindimento, menos den algun area cu mester di mehoracion. IDI ta remarca cu den contexto di e areanan aki mester tene na cuenta riba tamaño di ARA y su circunstancianan institucional.

Den e QAR ta reslata cu Algemene Rekenkamer Aruba (ARA) ta enfrenta un deficit di personal, cu solamente 10 empleado den 2021. A pesar di limitacion di recurso humano, e peticion di ARA pa e apoyonan di IDI den realisacion di e investigacion di SRNPHS ta demostra su compromiso pa desaroya competencia di staf den auditoria di rindimento. Sinembargo, e rapport ta agrega, e evaluacion di competencianan di auditor pa contratacionnan di auditoria specifico lo beneficia di practicanan mas structura y documenta.

Por ultimo IDI ta subraya cu e calidad di e investigacion SRNPHS por a ser mehora si e documentacion di auditoria a ser mehora, por ehempel, pa usa e matriz di diseño di auditoria y e matriz di hayazgonan di auditoria.

Den nan carta dirigi na IDI fecha 24 di juni ARA no solamente ta informa cu nan ta reconoce e importancia di e resultadonan di QAR den fortalece su trayecto pa cumpli cu e standardnan di ISSAI y cu nan a revisa e recomendacionnan suministra, pero alabes nan ta remarca cu como un institucion chikito Algemene Rekenkamer Aruba ta enfrenta retonan, manera entre otro recursonan humano limita y limitacionnan di capacidad.

ARA ta enfatisa cu e retonan aki ta haci dificil pa garantisa cu tur e ekiponan di audit tin e rango completo di experticio necesario pa compromisonan compleho manera auditoria di rindimento.

ARA ta indica cu mirando e limitacionnan aki, un enfoke personalisa ta esencial. Pa e motibo, nan a splica, nan enfoke strategico ta riba desaroyo di e capacidad existente pa bira mas generalisa door di amplia e rango di conocemento di e personal di audit den tur tres tipo di audit. E obhetivo final di ARA ta pa crea tres ekipo cu ta ser dirigi pa un solo lider, caminda e lidernan ta expertonan den un tipo di audit y e resto di e miembronan di e ekipo ta generalistanan cu por traha den cada team.

Pa e proposito aki, nan a sigui splica, e personal di auditoria lo participa den e PESA-programa

cuminsando e aña aki. Tambe nan a indica cu a tuma accionnan riba otro recomendacionnan. Den mehoracion di documentacion di audit, nan a splica cu nan a incorpora e Matris di Diseño di Audit y e Matris di Resultadonan di Audit den otro auditnan, adapta na nan necesidadnan. Ademas nan ta fortalece nan proceso di siguimento tambe pa analisa accionnan corectivo sistematicamente tuma pa entidadnan audita pa asina nan por aumenta nan impacto.