Ayera scolnan rond di Aruba a habri aña escolar 2017/2018 y algun tin mas retonan pa enfrenta cu otronan e aña aki, entre otro den locual ta mantencion di scol y cupo pa alumno.

St. Aloysius: Ainda den situacion deplorabel
St. Aloysius school, un scol basico na Noord, ta un otro scol cu pa varios aña caba ta wardando riba un renobacion, cual Bon Dia a yega di trece pa dilanti den publicacionnan anterior. Cabesante di e scol Vladimir de Cuba a bisa Bon Dia ayera cu nan ta prepara pa habri un otro aña escolar segun e posibilidadnan cu nan tin. E ta conta nos: “E situacion di st. Aloysius no a cambia mucho desde aña pasa cu boso a haci entrevista cu nos. Nos edificio ta den mesun situacion, laga mi uza e palabra bon cla: deplorabel.” E cabesante ta conta nos cu a pesar di tur esey, toch nan ta keda mantene un cantidad di casi 300 alumno. Pues e ta wak cu e mayornan ta keda cu un confiansa den e capacidad di e docentenan di e scol. “A pesar cu pafo e ta mustra un otro bista, paden e maestro ta traha cu hopi curason. Mi ta aplaudi nan pasobra trahando den un klas unda e temperatura ta di 32 pero e ta sinti 41 grado, no ta nada agradabel. Toch nan ta pone tur empeño pa por traha cu nos muchanan. P’esey mi ta masha orguyoso y agradecido cu nan ta keda bin traha pa nos muchanan pa e bienestar di Aruba.”

Sr. de Cuba ta bisa nos cu tur nan material di scol necesario a bin na tempo. Manera nos a yega di publica, e scol aki tin hopi problema cu nan tereno ora cu awasero ta cay; e ta bira un piscina olimpico manera cu e cabesante a describi e. E situacion aki ainda no ta drecha. Tin buraco den algun di e daknan di algun klas unda awa ta cay te paden y murayanan cu ta mustra basta deteriora.

Directiva nobo na Maria College Mavo
Cabesante na Maria College Mavo, Angeline Rosenstand, ta forma parti di e directiva nobo cu tin awo na Maria College Mavo. Nan ta preparando pa e aña escolar nobo for di vakantie caba segun sra. Rosenstand. E ta bisa nos: “Normalmente nos tin retonan ora ta trata ubicacion na playa. Nos ta un directiva nobo cu a acepta e reto pa por ubica e muchanan cu normalmente por a haya cupo na San Nicolas, pa nan yega un scol mas cerca na Cas. Si nos tabata tin cupo pa cien mucha, nos tin e ora un totalidad di 225 alumno den ciclo basico uno. Nos por tuma shete klas, e ora tres klas ta bay haya ubicacion na dependance.”

Juliana School ta haya falta di edificio bieu
Cabesante di Juliana School Paula Croes ta conta Bon Dia cu nan a cuminsa ayera yen di animo. “E aña ki tabata algo menos di preparacion pasobra e luga ta ‘ready to go’ caba, tur cos tabata limpi y cla. Kiermen e muchanan ta yega, haya nan rooster y cuminsa draai mesora”, e ta bisa nos. Manera conoci, Juliana School mester a muda su alumnonan na Piedra Plat pasobra nan edificio tabata cayendo den otro. Sra. Croes ta bisa nos cu nan ta keda pendiente di e desaroyo riba nan edificio bieu: “Esaki berdad ta bunita, limpi y nobo pero nos ta haya falta di e edificio bieu cu ta nos scol. Nos ta spera di tende mas di esey e aña aki.” Sra. Croes ta splica cu e mudamento aki no a stroba e muchanan di siña. Aña pasa nan a drenta den nan edificio nobo na Piedra Plat anto nan resultadonan final tabata hopi bon segun e cabesante, sperando mescos pa e siguiente aña escolar aki.

Colegio Arubano: Segundo scol pa introduci klasnan digital
Anuesca Baly di directiva na Ciclo Basico uno y dos di Colegio Arubano ta bisa nos cu preparacionnan a cuminsa siman pasa pa locual ta nan prome aña di klasnan digital. Esaki ta bira un proyecto piloto di cuater klas cu lo ta ‘digital ready’ y lo tin television cu WiFi. Nan ta uza ipads pero no lo ta ipad klassen, pero mas bien uzando e ipads enbes di uza bukinan.

E muchanan ta traha via un app, of via Pdf y lo ta mas interactivo cu e vak segun sra. Baly. E cuater klasnan ta na e parti di e Ciclo Basico anto docentenan tambe a haya un tayer con pa traha cu e sistema. “Tin otro scolnan na Aruba cu tambe ta bezig cu ne, nos ta e di dos voorgezetschool cu tine. San Antonio a cuminsa aña pasa cu ne manera mi a compronde, anto nos como Havo/Vwo a cuminsa e aña aki. Nos ta den un era di tecnologia pues nos no por cana atras, nos tin cu sigui purba di mehora via di introduci tecnologia constantemente den enseñansa,” sra. Baly ta conta nos. E ta sigui bisa cu: “E proyecto a tarda, nos tabata tin e pa dos aña caba pero awor akinan e ta start como piloto. Nos a pidi mayornan pasenshi cu nos pasobra e ta cuminsando na stapnan chikito.”

Ciclo Basico uno y dos tin e aña aki 508 alumno; cual bo por bisa ta un scol riba su mes practicamente. Colegio tin 11 klas di ciclo basico uno y 9 klas di ciclo basico dos e aña aki. E ta mas hopi cu aña pasa pero nan localidad por carga esey segun sr. Baly. Colegio Arubano den total tin 1688 alumno e aña escolar aki.