Temporada di Carnaval ta yegando su fin y pueblo ta preparando pa tira e ultimo dos fiesta grandi pa clausura e temporada mas grandi di aña. Aki ta trata di e paradanan di Carnaval Grandi na San Nicolas y Oranjestad. Sigur un weekend cu lo yen di ambiente y color, pero nos mester tene na cuenta tambe di nos seguridad.

Aki ta sigui par tip pa protege bo mes y bo famia durante e ultimo dianan di Carnaval 72.

Muchanan bao di 5 aña di edad mester keda cas!

Esaki ta un topico controversial, ya cu aña tras aña ta mira varios mayornan cu ta trece nan yiunan chikito y baby den paradanan di adulto, cual semper ta causa indignacion riba red social. E realidad ta cu muchanan menor di 5 aña no ta gosa di Carnaval manera adultonan; e ta un dia hopi druk, musica ta demasiado duro, tin demasiado hende riba otro, y nan ta rondona di adultonan cu ta consumi alcohol, entre otro. Esakinan tur ta crea un ambiente inadecua pa e mucha. Pa e motibo aki, mester conseha pa laga yiunan chikito na cas, sea cu famia of amigonan cu no lo asisti na e parada.

Sa bo limitenan y semper tin un amigo DIDI
Papiando di consumo di alcohol, ta importante pa sa bo limitenan y adheri na esaki. Nos sa cu Carnaval ta un dia festivo, y consumo di alcohol ta inevitable. Asina mes, mester conseha pa evita consumo excesivo y si ta desea pa consumi alcohol, percura pa semper tin bo Amigo DIDI. Amigo DIDI ta e persona cu na un fiesta of celebracion ta e persona designa cu no ta bebe alcohol pa asina por hiba e personanan cu si a bebe alcohol pa nan cas sano y salvo.

Protege bo cuero y bo oido
Aunke hopi hende ta pensa cu ta importante pa muchanan bisti earplugs durante Carnaval, mester enfatisa cu esaki ta mesun importante pa adultonan. E limite safe di decibel pa nos oido ta rond di 70 dB pa un periodo largo. Sinembargo, eventonan grandi manera un parada por genera te cu 120 dB di zonido, cual por trece daño ireparable na nos oido. P’esey, sea consciente di bisti earplugs y protege bo oido durante e parada.

Un otro parti di curpa cu ta importante pa cuida ta bo cuero. Aruba ta conoci pa su solo cayente, y durante e paradanan grandi di Carnaval, hende ta mas exponi na e rayonan di solo y por kima hopi mas liher. Pues ta importante pa bisti sunblock (al menos un di SPF 30) y aplica varios biaha durante e parada. Tambe ta consehable pa bisti pechi, bril y paña cu por protege bo di solo. Corda cu sunblock mester wordo aplica di nobo caba pasa 1-2 ora pa por garantisa un bon proteccion. Cancer di cuero no ta desaroya di un dia pa otro pero si despues di un temporada largo di exposicion na rayonan fuerte di solo cu nos na Aruba no por evita.

Hidrata bo mes; bebe awa!
Banda di consumi bebida manera alcohol, juice of soft drink, ta importante tambe pa keda hidrata cu awa. Durante e ultimo aña, nos a mira varios caso di adultonan mayor cu ta bira malo pa via di e calor y solo cayente. Pues sea consciente pa bo bebe awa de bes en cuando pa preveni cualkier deshidratacion.

No warda, busca ayudo!

Por ultimo, nos ta recorda pueblo cu durante parada lo tin patruya di polis y ayudantenan di Cruz Cora pa atende personanan cu emergencia medico. Si bo ta sinti malo of straño, no warda pa haya ayudo, busca ayudo di personal inmediatamente! Asina por sigura consecuencianan serio pa bo salud.

Bon Dia Aruba un bes mas ta urgi pueblo pa tuma cuida di bo mes y di personanan rond di bo. Carnaval ta un parti integral di nos cultura, y nos ta disfrut’e hopi mas si nos ta celebr’e den un ambiente sano y salvo!