(AP) — Un biyonario di California conoci como aliado di Donald Trump a usa su testimonio na su huicio federal ayera pa cuestiona e liderazgo di Trump riba politica exterior, bisando cu e ex-presidente no tabatin idea tocante e dinamica den Medio Oriente.
E acusado, Tom Barrack ta acusa di usa su “acceso unico” como amigo di hopi tempo di Trump pa duna informacion confidencial tocante administracion di Trump na e Emiratonan Arabe Uni pa avance a politica exterior di e Emiratonan y nan interesnan comercial. Fiscalnan ta bisa cu mientras oficialnan Emirati tabata den consorcio cu Barrack, nan tabata premie door di hinca miyones di dollar den su empresanan comercial.
Barrack, kende tabata presidente di comite inaugural di Trump, a bisa un hurado na New York City cu e ta considera Trump como un comerciante “cu curashi” y “inteligente”, y a sostene su candidatura como un politico “outsider” kende “por tabata algo bon pa e sistema”. Sinembargo, el a testigua cu despues el a bira desilusiona pa e retorica anti-Musulman di Trump y otro posicionnan divisivo cu el a bisa tabata “desastroso”.
Barrack tambe a testigua cu lo tabata “imposible” pa e actua como agente stranhero pa un inversionista di Medio Oriente den su compania pasobra otro inversionistanan lo a opone esaki. Barrack a bisa cu tin un proceso intenso di seleccion pa sigura cu managernan di placa no tin conflicto di interes asina.
Barrack, 75, a declara inocencia di actua como agente no registra di un gobierno stranhero, obstruccion di husticia y duna declaracion falso. Su abogadonan a rechasa cu el a haci algo fout.
