Den nomber di Padu Lampe su famia y tambe di fundacion Padu, Alice van Romondt a gradici e tributo postumo cultural cu gobierno di Aruba a organisa popularmente riba Plasa Padu Lampe, ayera nochi.

“Mi kier expresa den nomber di famia y fundacion, un gratitud enorme pa locual gobierno a demostra pa cu entiero di Padu,” el a bisa.

Den forma special el a gradici Minister President, Evelyn Wever-Croes y tambe Minister di Cultura, Xiomara Ruiz-Maduro, pero tambe su ex coleganan di Departamento di Cultura Aruba (DCA), kendenan a haci un gran trabou pa rindi tributo y honor na e memoria di Padu Lampe.

“Den corto tempo nan a hinca un programa den otro cu mañan, ora cu nos papia di e programa, nos lo bisa cu nan a marca historia,” el a bisa.

Seguidamente Van Romondt a expresa palabra di gratitud den nomber di Vivian Lampe kende ta yiu di Padu, y su nietonan. Igualmente di parti di e fundacion mes, cu ta consisti di shete miembro boluntario. El a reconoce cu nunca nan lo por a logra locual DCA a logra hinca den otro: “Hopi, hopi danki”, el a expresa.

El a laga sa cu di parti di fundacion Padu, ya caba e preparacionnan tabata tumando luga pa celebra Padu su 100 aña di cumpleaño na april 2020. Van Romondt a laga sa cu nan no a spera cu 5 luna prome, Padu a bay laga nos.

Actualmente tin diferente proyecto cu ta coriendo paralelo, debi cu Padu tabata un artista multifacetico. Entre otro, nan ta trahando pa organisa un exposicion grandi di Padu su trabounan, cu lo forma parti di e publicacion di un buki rond di su bida como pintor. Tambe nan ta trahando pa digitalisa y pone den letter of partitura cantidad di material musical, hopi di nan inedito ainda di Padu.

Solamente na Padu su cas nan a topa alrededor di 250 cassette di antes cu composicion di dje cu nunca a publica. E ta un proyecto cu e fundacion ta spera cu pa april, den cuadro di Padu su natalicio 100, nan por bin cla. Den dje ta participa un grupo di musico profesional trahando riba e transcripcion di e composicionnan aki pa asina otro musiconan por toca nan.

LEAVE A REPLY

Please enter your comment!
Please enter your name here