Gobierno di Aruba a tuma un decision di gran impacto social cu ta enfoca riba mehora e situacion financiero di adulto mayor. Durante un conferencia di prensa ayera tardi, prome minister Mike Eman; hunto cu minister di Salud, Asunto Social, Cuido di Adulto Mayor y Maneho di Adiccion, Mervin Wyatt-Ras; y director di AZV, Edwin Jacobs a anuncia aprobacion di un medida cu ta baha prima di AZV di 5% pa 0% pa pensionadonan.

E medida aki a ser aproba den reunion di Conseho di Minister dia 12 di december 2025 y ta baha e prima di AZV di 5% pa 0% pa tur pensionado cu tin un entrada adicional di menos cu 30 mil florin pa aña. E medida aki a drenta na vigor na 1 di januari 2026.

Segun prome minister Eman, e eliminacion di e prima di AZV pa e grupo aki ta un paso importante den direccion di reforsa e poder di compra di pensionadonan y di duna mas espacio financiero na un grupo di persona cu diariamente ta confronta e realidad duro di costo di bida halto.

Adulto mayor ta representa un grupo grandi y creciente di e comunidad Arubiano. Hopi di nan ta depende principalmente di nan pensioen di biehes y tin posibilidad limita pa aumenta nan entrada. Eliminando e contribucion mensual di AZV, gobierno ta crea un alivio directo den e presupuesto mensual di pensionadonan, permitiendo nan pa cumpli mihor cu nan necesidadnan basico, cuido di salud y compromiso familiar.

E decision a ser tuma den coordinacion entre Ministerio di Salud Publico, AZV y Conseho di Minister. E mandatario a enfatisa cu e medida ta parti di un vision mas amplio pa proteha e grupo mas vulnerable den sociedad, sin compromete e sostenibilidad financiero di e sistema di salud.

Hunto cu e eliminacion di prima di AZV, gobierno a implementa durante 2025 varios otro mehoracion financiero pa pensionadonan. Un di esunnan mas relevante ta e aumento di e reparatietoeslag, un suplemento crea pa compensa pa e presion di costo di bida. Na april 2025, Gabinete AVP-FUTURO a aumenta e raparatietoeslag cu 250 florin, y na december ultimo a esaki a aumenta cu otro 150 florin. Ademas, gobierno a introduci tambe un aumento general di pensioen di 7.7% pa esnan cu tin un pensioen completo, cu ta representa un aumento di mas cu 250 florin mensual.

Combinando tur e medidanan aki, hopi pensionado ta mira un aumento total di mas cu 500 florin den nan entrada mensual. Segun gobierno, esaki ta mustra un enfoke structural y sostenibel pa reforsa e seguridad economico di adulto mayor, mas cu solamente medida temporal.

E importancia di e decisionnan aki ta bira mas claro ora mira e realidad demografico di Aruba. Prome minister Eman a indica cu segun dato di Censo 2020, e cantidad di adulto mayor tabata riba 17 mil persona. Datonan mas recien di instancianan di pensioen ta indica cu actualmente tin mas cu 19 mil persona cu ta ricibi pensioen y cu ta biba na Aruba. E tendencia di embehecemento di poblacion ta pone presion riba sistema di cuido di salud y seguridad social.

Distribucion di adulto mayor ta varia segun region. Noord ta e region mas hoben, cu 12.8% di su poblacion cu tin 65 aña of mas. Oranjestad tin un porcentahe di 17.1%. Santa Cruz tin 15.5%, Paradera 14.1%, Savaneta 18% y San Nicolas ta yega casi 20 % di su poblacion cu a yega edad di pension.

E mandatario a remarca cu e diferencia regional aki ta importante pa planificacion di politica publico. Gobierno a indica cu e concentracion di adulto mayor den cierto area ta implica un necesidad pa mas cuido, mas servicio medico, y mas infrastructura adapta pa persona di tercera edad. Esaki ta inclui no solamente casnan pa adulto mayor, pero tambe servicio comunitario y apoyo social.

Den e marco aki, el a informa, Ministerio di Salud Publico ta trahando riba otro iniciativa importante pa adulto mayor. Un di nan ta e preparacion di un landsverordening langdurige zorg, cu ta enfoca riba cuido di largo plaso. E ley aki ta apunta pa crea un sistema mas structura, profesional y consistente pa cuida adulto mayor cu tin necesidad medico prolonga of limitacion funcional.

E intencion ta pa AZV maneha un fondo permanente dedica na cuido a largo plaso, pa asina garantisa cu servicio ta disponibel na un manera sostenibel. Gobierno kier evita solucionnan temporal y ta busca un sistema integra cu por responde na e demanda creciente cu ta resulta for di embehecemento di poblacion.

Pa loke ta trata e parti financiero, director di AZV y SVB, Jacobs a confirma cu e eliminacion di prima di AZV pa pensionadonan cu entrada adicional bao di 30 mil florin no lo crea un problema inmediato pa e fondo di salud. Segun el a splica, e medida lo ser financia for di espacio cu ta existi den e marco di BAZV. Proyeccion financiero actual ta mustra cu AZV tin capacidad pa absorbe e cambio sin pone e sistema na riesgo.

Jacobs a subraya cu e medida ta aplica pa tur pensionado cu tin un entrada adicional riba pensioen, di maximo 30 mil florin. For di 1 di januari 2026, e grupo aki no lo paga ningun prima di AZV mas, locual ta marca un cambio importante compara cu e sistema cu a ser introduci na 2001, ora AZV a ser implementa y gobierno a dicidi pa conecta e contribucion di pensionadonan cu e fondo di pensioen di biehes.

Eliminando e prima di 5%, e cantidad ey ta keda efectivamente den e fondo di pensioen, aumentando e entrada neto di pensionadonan. Den cierto casonan, el a splica, parti di e aumento di pensioen cu a ser duna anteriormente a ser financia directamente for di e reduccion di prima di AZV, mustrando con e diferente medidanan ta conecta cu otro.

E impacto social di e decisionnan aki ta amplia. Adulto mayor ta un grupo cu a contribui significativamente na desaroyo di Aruba durante nan bida laboral. Gobierno a expresa cu cuida bienestar di nan no ta solamente un obligacion social, pero tambe un expresion di e balor di comunidad y solidaridad nacional.

Mientras Aruba ta sigui enfrenta reto economico, incluyendo costo di bida y cambio demografico, sostenibilidad di sistema di seguridad social lo keda un tema central. Gobierno a reconoce cu evaluacion continuo lo ta necesario pa sigura cu e medidanan aki keda efectivo na futuro. A pesar di esaki, e eliminacion di prima di AZV pa pensionadonan cu entrada limita ta representa un paso concreto y inmediato pa alivio financiero.

Cu e implementacion di e medida aki, atencion lo bay riba e efecto practico y sostenibel di e decision. Pa hopi pensionado, sinembargo, e cambio ta nifica mas espacio den nan cartera, mas stabilidad, y un señal claro cu gobierno ta pone bienestar di adulto mayor na un lugar prioritario den su agenda social.