Siman pasa un grupo di alumno di VWO 5 di Colegio Arubano hunto cu 4 docente a bishita Den Haag den cuadro di un biahe di estudio na Hulanda. E programa di e dia aki a inclui un bishita na diferente universidad den regio como tambe un bishita na Arubahuis y na ministerio di Enseñansa, Cultura y Ciencia di Hulanda.
Minister plenipotenciario Besaril tabata tin e placer pa ricibi e grupo di alumno y docente na Arubahuis. E mandatario ta considera e bishita uno masha special mirando cu ta trata di e prome grupo grandi di alumnonan di Colegio Arubano cu ta bin Hulanda pa un biahe di estudio y cu Arubahuis tin e placer di ricibi. Durante e bishita na Arubahuis minister Besaril a dirigi su mes na e grupo y a duna conseho y palabranan di estimulo na e alumnonan presente. Tambe e grupo a ricibi informacion relevante for di afdeling onderwijszaken pa loke ta guia y sosten di studiantenan na Hulanda.
E programa di Colegio Arubano den regio Den Haag tabata un hopi varia y intensivo. Parti mainta diferente grupo a haya chens pa bishita tres diferente universidad esta Universiteit Leiden, Erasmus Universiteit na Rotterdam y Technische Universiteit Delft. Cada universidad a prepara un programa special pa e grupo di alumno unda cu nan por a haya un bon bista di e facilidadnan y tur loke cada universidad tin di ofrece.
Parti merdia e grupo a bini hunto na Arubahuis pa despues sigui parti atardi cu un bishita na ministerio di Enseñansa, Cultura y Ciencia di Hulanda na unda cu Arubahuis den coordinacion cu dicho ministerio a plania un programa special cu informacion di diferente instancia pa e grupo di alumno di Colegio Arubano. E programa a inclui entre otro presentacion di Dienst Uitvoering Onderwijs (DUO) cu a duna informacion tocante financiamento di estudio na Hulanda. Studiekeuze123 a duna informacion y conseho riba e proceso di escogencia di estudio. E instancia DUWO a duna informacion tocante vivienda pa studiante den regio Den Haag y e importancia pa orienta y inscribi na tempo pa vivienda. Na final Stichting WeConnect a duna informacion tocante nan trabou y unda tambe un ex studiante di Colegio Arubano a comparti su experencia di estudio y bida na Hulanda cu e grupo. E encuentro na ministerio di enseñansa a wordo clausura cu un borrel na unda tur presente por a socialisa y intercambia di idea y informacion.
Arubahuis ta gradici ministerio di Enseñansa, Cultura y Ciencia di Hulanda y tur e instancianan menciona pa nan cooperacion y pa nan contribucion valioso pa e alumnonan di Colegio Arubano.
