Medio juni NWO ta organisa e di dos edicion di Siman di Investigacion Caribense. Educacion y traspaso di conocemento ta hunga un rol importante. Investigadonan procedente di region di Caribe of esnan cu ta haci investigacion den e region aki, lo duna tayernan pa alumnonan di scol secundario e simannan prome cu e evento.

Lo ofrece e tayernan aki tanto na algun scol na Hulanda como scolnan na Aruba, Boneiro, Corsou, Saba, Sint Eustatius y Sint Maarten.

E serie di tayer aki na scol secundario ta haci e hobennan consciente di balor di ciencia den nos comunidad. Pasobra, dicon haci investigacion ta asina importante y kico un investigado ta haci tur dia? Ki tipo di profesion ta cuadra cu esaki y con bo por haya un funcion asina?

E temanan cu ta bini dilanti den e tayernan ta hopi diverso. Ta motiva e hobennan specialmente pa haci e investigadonan hopi pregunta y haci tareanan cortico na e sitio ey mes. Preguntanan cu lo trata ta por ehempel: con economia di un ‘small island state’ manera Corsou of Saba ta funciona? kico exactamente ta coleccion di data y como tarea: diseña un encuesta propio. kico ta e relacion entre alimento y sostenibilidad y con abo por mantene bo ‘carbon footprint’ mas chikíto posibel? Di e manera aki nan ta envolve e hobennan den e programa cu ta dirigi riba comparti conocemento y formacion di red di contacto.

Tammy-Sue Lejuez, alumno di HAVO 4 – Colegio Nigel Matthew, Aruba:

“haci mas escogencia responsabel. Pensa riba loke bo ta come y con esey ta aumenta bo ‘footprint’.”

Amber van Veghel, investigado di Alimento y Cambio di Clima na Universidad di Aruba:

“Mi a haya sumamente agradabel pa hiba combersacion cu e muchanan tocante alimento. Nos a papia tocante cultura y custumber alimenticio. Mi tambe a siña hopi di e alumnonan. Asina un grupo a descubri cu na algun plantacion di coco tin rooi coba cu tin awa aden, di manera cu e coco ta cay suave den awa y no duro riba tera.”

Programa Siman di Investigacion Caribense (13-17 juni): https://www.nwo.nl/bijeenkomsten/week-van-het-caribisch-onderzoek

For di comienso di e programa Caribense NWO a organisa tres ronda di financiamento. Esaki a duna investigacion cientifico na y den Caribe Hulandes un impulso fuerte. Bo por haya mas informacion tocante e actividadnan y produccion riba e pagina di e programa.