Dos aña despues cu alumnonan di Mavo a bay den accion contra Colegio Arubano su exigencianan halto pa admision pa Havo, alumnonan atrobe ta protestando. E biaha aki e scol secundario a haci cierto cambionan na april cu ta limita nan perspectivanan di studia, asina e alumnonan ta haya.
Riba nan pagina di Facebook ‘Leerlingen Mavo op Aruba in Nood’ nan a cuminsa pone e datonan kico awor ta e problemanan. Tambe un carta a bay pa Inspeccion di Enseñansa pa mustra con e ultimo exigencianan di Colegio Arubano ta ‘perhudica nan’ manera e hobennan ta bisa, di sigui studia riba un nivel mas halto.
Biaha pasa e minister di Enseñansa tabatin un oido pa e alumnonan y a dicidi di forsa Colegio Arubano (cu cambio den ley unda e minister ta haya mas autorisacion) pa hala e exigencianan aden. Sinembargo awor 2 aña mas leu, atrobe e scol a bin cu cambionan ‘na ultimo’ cu a cay como un sorpresa no agradabel pa e alumnonan di Mavo 3. E grupo di hobennan cu ta protestando te awor no a ricibi un contesta di Colegio Arubano, Inspeccion ni minister.
Rapport a keda riba mesa
Locual tambe a keda sin atencion ta e implementacion di e rapport di 2014 pa un miho conexion di Mavo pa Havo na Aruba. Segun Colegio Arubano e tempo ey nan kier a hisa e exigencianan pa admision pa motibo cu alumnonan di Mavo hopi biaha no ta bay bon ora nan ta den Havo. Pa evita cu nan ta perde tempo, segun e scol, nan kier selecciona e miho na porta. Sinembargo e diferencianan asina investigacionnan a mustra entre alumnonan cu ya ta den Havo compara cu esunnan cu ta bin for di Mavo no ta asina grandi. Solamente pa un par di vaknan y a cuminsa cu Summer School pa e alumnonan biniendo di Mavo por haal in e retraso. Asina e minister di Enseñansa a logra.
Pero cu e resto di e plannan den e rapport nada a wordo haci. Y awor dos aña despues atrobe Colegio Arubano ta hisa e exigencianan sea limita e opcionnan por ehemplo di scoge vaknan. Un cambio ya ta di aña pasa sin cu por ehempel Inspeccion di Enseñansa tabata consciente di dje. Esey ta e exigencia pa Wiskunda B: awor alumnonan di Mavo mester un 8 riba nan diploma pa asina por scoge e vak aki ora di bay Havo na Colegio Arubano. Prome esaki tabata un 7, cual ainda ta e caso na Colegio San Nicolas unda tambe por sigui havo.
Discriminacion
Yuri Koffy di Juliana Mavo School a caba di haci su examen (Mavo 4) y ta conta dicon e ta haya cu e exigencia aki ta ‘erg’. “Mi no ta compronde dicon no tin uniformidad entre e dos scolnan. Y si bo ta den havo 3 pa bay havo 4 awor (alumnonan di Colegio Arubano mes, red.) bo mester solamente un 6 pa Wiskunde B. E ta un forma di discriminacion. Si mi examen awor ta bin malo, mi no por scoge Wiskunde B. Anto mi mester e vak ki pasobra mi kier bira un chemical engineer. Ma siña duro pa haya e miho punto posibel. Pero si e exigencianan ta mucho halto, e ta hopi dificil Por ehempel na Hulanda bo mester un 6,8. Mi ta sinti mi mes perhudica. Y mi no por bay San Nicolas pasobra e ta mucho leu.” E ta bisa cu esey ta kita tempo pa studia.
Cambionan den pakete
Na april Colegio Arubano a bin cu e cambionan di paketenan di vaknan cu alumnonan mester scoge. Segun e alumnonan di Mavo, esaki a bin hopi laat y nan a ripara cu e cambionan ta limita nan opcionnan considerabel. Asina un alumno cu kier bira docente di Wiskunde, un opleiding cu tambe por sigui na Universidad di Aruba mes, awor ta forsa di scoge e pakete N&W y asina mester tuma vaknan manera Scheikunde y Natuurkunde tambe. Mientrastanto nan no ta necesario pa bira docente di Wiskunde. Y esaki tin su consecuencia como e pakete aki ta uno dificil pa hopi alumno, cu nan no ta bay scoge pa Wiskunde B mas, un rekisito pa drenta e opleiding di docente Wiskunde. Esaki ta afecta manera e alumnonan Raomar Gomes y Maria Acosta kende Bon Dia Aruba tambe a entrevista. Nan ta den Mavo 3 di Juliana School. “Mi no ta kere esaki ta husto cu bo ta obliga asina pa scoge un pakete di N&W”, asina e hoben Acosta ta bisa.
Un otro problema pa e alumnonan di Havo ta cu, no por scoge pa un vak extra. Esaki ta corta e caminda pa ora di caba cu Havo pa bay VWO unda mester 8 vaknan. Y e cambionan den e paketenan tambe ta causa cu esunnan di Havo no ta match mas esunnan di VWO, cual tambe ta stroba e hobennan cu kier sigui studia na Colegio Arubano despues di nan Havo.
